dad Ursicin G. G. Derungs-Bartolomei
Tema de quei evangeli: la tschoccadad partenent Jesus, e quei ual da vart de quels che vessen da veser meglier.
1. Tschoccadad della famiglia perschuadida che Jesus seigi ord il tgau (v. 21) e ch’encurevan el (v. 31). A quella tschoccadad rispunda Jesus cun ina damonda che va sur la parentella o: «Tgi ei mia mumma e tgi mes fargliuns?» El sevolva e mira sin tut quels ch’eran entuorn el: «Quels ein mia mumma e mes fargliuns.» Esser parents cun Jesus ni buc esser: quei ha negina muntada. Sia aviartadad ha buc cunfins da parentella. Quei che quenta ei sulet la cardientscha e l’ovra.
2. Tschoccadad da vart dell’elita religiusa e morala de Jerusalem, quels che dian co ei fuss da capir e da far – tschocs è encunter l’evidenza dell’ovra de Jesus che scatscha nauschasperts. La risposta de Jesus ei cheu terribla: «Il puccau encunter il Spert Sogn vegn buca perdunaus.» (v. 29). Ei schevan gie ch’el seigi possedius d’in nauschaspert e scatschi demunis en num de Satan (v. 30).
Aunc in pign detagl: denter ils parents de Jesus figureschan sia mumma, ses frars e sias soras (v. 32). Entgins manuscrets han schau naven «sias soras»! Sa pertgei?
Mc 3,20–35
20El ei turnaus a casa, e puspei ei in pievelun seradunaus, da maniera ch’ei vevan gnanc peda da magliar. 21E cura ch’ils ses han udiu da quei, ein els semess sin via per vegnir e prender a mauns el, pertgei els schevan: El ei ordasenn!
22Ed ils mussaders dalla lescha ch’eran vegni da Jerusalem schevan: El ha il Beelzebul, ed era: Tras il prenci dils demunis scatscha el ils demunis. 23Cheu ha Jesus clamau neutier els ed explicau ad els en semeglias: Co sa il satan scatschar il satan? 24Sch’in reginavel ei buca units, sa el buca subsister. 25E sch’ina casada ei buca unita, sa ella buca subsister. 26E sch’il satan sedrezza encunter sesez ed ei buca units, eis el buca da cuoz, mobein alla fin. 27E negin po penetrar ella casa d’in ferm e rubar siu fatg, sch’el ha buca ligiau igl emprem il ferm. Pér lu po el sblundergiar sia casa.
28En verdad jeu ditgel a vus: Tut vegn perdunau als carstgauns, ils puccaus e las blasfemias, sch’ei han blasfemau. 29Mo tgi che blasfema encunter il Spert sogn, vegn mai a retscheiver perdun; el ei culpeivels d’in puccau perpeten. 30Els vevan numnadamein detg: El ha in spért malmund.
31Sia mumma e ses frars ein vegni, e stond ordaviert han ei fatg clamar el. 32Bia glieud seseva entuorn el, ed ins ha detg ad el: Uarda, tia mumma, tes frars e tias soras ein cheuo ed enqueran tei. 33El ha rispundiu ad els: Tgi ei mia mumma? E tgi ein mes frars? 34E mirond sin quels che sesevan entuorn el, ha el detg: Mirei mia mumma e mes frars! 35Scadin che fa la voluntad da Diu, quel ei miu frar e mia sora e mia mumma.
