Oraziuns

Nus purschein cheu ina pintga schelta dad oraziuns cristianas che pon accumpignar nus atras il mintgadi e dar a nus ils plaids cu els mauncan.

Babnos

Bab nos, qual che ti eis en tschiel,

sogns vegni fatgs il tiu num.

Tiu reginavel vegni tier nus.

Tia veglia daventi sin tiara sco en tschiel.

Nies paun da mintga di dai a nus oz.

Perduna a nus nos puccaus

sco nus perdunein a nos culponts.

E meina nus buc en empruament,

mo spendra nus dil mal.


Laud trinitar

Gloria seigi al Bab ed al Fegl ed al Spert sogn,

sco igl ei stau all’entschatta,

aschia uss ed adina ed en perpeten. Amen.


Cardientscha apostolica

Jeu creiel enten Diu, Bab tutpussent,

scaffider dil tschiel e dalla tiara.

Ed enten siu sulet sogn Fegl, Niessegner, Jesus Cristus,

il qual ei retscharts dil sogn Spert,

naschius da Maria purschala.

Ha endirau sut Pontius Pilatus,

ei vegnius crucifigaus, morts e satraus.

Ei ius giu enten ils uffiarns,

il tierz di levaus si da mort en veta,

ei ius a tschiel e sesa da vart dretga dil Bab tutpussent,

danunder ch’el vegn a vegnir a derschar sur vivs e morts.

Jeu creiel enten il sogn Spert,

ina sontga catolica Baselgia,

cuminonza dils sogns,

remischun dils puccaus,

levada dalla carn

e la veta perpetna.

Amen.


Salidada

Salidada seis ti Maria,

pleina da grazia,

il Segner ei cun tei,

ti eis benedida denter la dunnauns

e benedius ei il fretg da tiu best, Jesus.

Sontga Maria, mumma da Diu,

roga per nus pucconts,

uss e sin l’ura da nossa mort.


Oraziun dalla damaun

(+ munta ina pintga crusch sur igl organ correspundent)

Segner, arva + mias levzas

che mia bucca annunzi tiu laud

ed anfli buns plaids.

Segner, arva + mes egls

ch’jeu admiri tia grondezia

e survesi buca la pupira dils carstgauns.

Segner, arva + mias ureglias

ch’jeu audi tiu plaid

e resti attents pil griu dil pauper.

Segner, arva + miu nas

ch’jeu percorschi tia odur

e senti il fried dil mund.

Segner, arva + mi’entira fatscha

ch’ jeu sevolvi viers tei

e seigi aviarts per tuts.

Segner, arva + miu cor

ch’ jeu hagi plaz per tei

e buns sentiments per tuts carstgauns.

Segner, arva + mes mauns

ch’ jeu senti la rihezia dalla veta

e seigi generus el dar.


Oraziun dalla sera

La notg ei cheu, il di vargaus,

o Diu, da mei seis po ludaus.

Per tut il bien ch’a mi has dau

da cor a ti sei engraziau.

Perdun’a mi ils mes puccaus

da cor da quels sun enriclaus.

Tiu bratsch pussent schurmegi nus

da tut il nausch e prigulus.