da sur Marcus Flury
Pintgas caussas san ver in grond effect. Igl evangeli dad oz plaida da quei. El consista ord duas semeglias. Igl emprem vegn il reginavel da Diu cumparegliaus cun in um che fiera il sem ella tiara. Naven da lu sa el far nuot auter che sperar ch’el creschi e porti fretg. Igl ei ina semeglia encunter la resignaziun e che vul far curascha da crer che quei che nus fagein porti fretg. Il reginavel da Diu selai denton buca sfurzar neutier. El ei in regal da Diu.
La secunda semeglia muossa ella medema direcziun. En nossa veta vein nus enqualga breigia da crer ch’ei sappi dar ord enzatgei pign e mudest ina gronda ed impurtonta caussa. Contas gadas ha in bien plaid midau enzatgei ella veta dad in carstgaun? Dieus agescha era entras nus fleivels carstgauns. Gest entras pintgas caussas vegn il reginavel da Diu semnaus. Sin la cumplenida da quei reginavel stuein nus denton aunc spitgar. Perquei ein speronza e perseveronza impurtontas vertits cristianas.
Mc 4,26–34
26In’autra ga ha el detg: Cul reginavel da Diu eis ei sco cun in um che ha fiers il sem ella tiara. 27El va a durmir e leva puspei, ei fa notg e puspei dis, la semenza prui e crescha, el sa buca co. 28Da sez producescha la tiara, igl emprem il strom, lu la spigia, lu il garnetsch cumplein ella spigia. 29E cura ch’il fretg ei madirs, smeina el beinspert la farcla, pertgei il temps da raccolta ei cheu.
30E puspei ha el detg: Cun tgei lein paregliar il reginavel da Diu? Ni en tgei semeglia presentar el? 31Igl ei sco cun in garnetsch da senav. Cura ch’el vegn semnaus el tratsch, eis el il pli pign da tut ils sems ch’ein sin tiara; 32mo inaga ch’el ei semnaus, sesaulza el e daventa la pli gronda da tuttas caglias en iert, ed el catscha grondas frastgas, da maniera ch’ils utschals dil tschiel anflan schurmetg en si’umbriva.
33Cun bia da quellas semeglias ha el perdegau ad els il plaid tenor la mesira da lur capientscha. 34Ed el ha buca plidau cun els senza semeglias, mo dapersei ha el explicau tut a ses giuvnals.
