da Maria Cristina Derungs-Bartolomei
Oz prevala silla dumengia la solemnitad de sogn Gion Battesta, ina dellas ca. 20 fiastas principalas digl onn liturgic. Sulettamein dad el vegn festivada la naschientscha, sco per Niessegner e per Maria. Quei muossa la muntada tut speciala de quella persuna ella veta sezza de Jesus e della Baselgia.
Igl evangelist Lucas ha mess quei en evidenza cun grond inschign litterar. El ha baghegiau si in raquent cun parallelas: l’annunziaziun a Zaharias e quella a Maria; la naschientscha de Gion e quella de Jesus. Tut en in raffinau ritmus dil temps che la Baselgia repeta aschia: Gion Battesta nescha el mument ch’il sulegl entscheiva a prender giu, ferton che Jesus nescha sis meins pli tard, cura ch’il sulegl entscheiva e crescher, ual sco Gion Battesta di: «El [Jesus] sto crescher; mo jeu stoi vegnir dil meins» (Gn 3,30).
Gion Battesta va ordavon al Segner, ei siu «pot», prepara la via agl evangeli. Quei ei la vocaziun apostolica della Baselgia e de mintga cristifideivel. Mo tut quei stat en negina proporziun cul dun che vegn encunter a nus: la purschida dil Reginavel de Diu. Igl ir ordavon fuss nuot, sch’ei muncass igl ir suenter, il suandar Jesus, senza prender scandel della humilitonza de sia realitad humana e dellas pretensiuns che sia annunzia cumporta
Lc 1,57–66.80
57Per Elisabet ei il temps da parturir secumplenius, ed ella ha parturiu in fegl. 58Ses vischins e parents han enderschiu ch’il Segner hagi fatg gronda misericordia cun ella, ed els ein selegrai cun ella.
59Ed igl otgavel di ein els vegni per surtagliar igl affon. Ins leva numnar el Zaharias sco siu bab. 60Mo sia mumma ha priu il plaid e detg: Na, siu num duei esser Gion! 61Cheu han ins rispundiu ad ella: Negin da tia parentella ha num aschia. 62Ed ins ha cun segns emparau siu bab, co el vegli ch’ins detti num ad el. 63El ha fatg dar ina tabla ed ha scret: Gion ei siu num. E tuts ein sesmarvigliai. 64En quei mument ei sia bucca s’aviarta e sia lieunga sesligiada, ed el ha plidau e ludau Diu. 65Tut ils vischins ein stai surpri da tema, ed ell’entira muntogna dalla Giudea risdav’ins da tut quels eveniments. 66Tut tgi che udeva quei, prendeva a cor ei e scheva: Tgei vegn ei pomai a dar ord quei affon? Pilver, il maun dil Segner era cun el.
80Igl affon denton carscheva e vegneva ferms da spért. Ed el ei vivius el desiert, tochen il di ch’el ei semussaus avon Israel.
