· 

18. dumengia ordinaria (B)

dad Ursicin G. G. Derungs-Bartolomei

Igl entir capetel 6 digl evangeli de Gion che vegn legius quellas dumengias ei dedicaus al tema dil «paun». All’entschatta plaida quei capetel della multiplicaziun dil paun e digl entusiassem della fuola ch’emprova suenter la miracla da contonscher Jesus ed ils ses ch’ein i a l’autra riva. L’«emprema riva» fuss simbolicamein quella dil paun che saziescha e fa tuts cuntents. L’«autra riva» ei quella dil «paun» sco enzenna. Enzenna de zatgei pli grond. Che provochescha la cardientscha.

Il text de questa dumengia tschenta in fundament essenzial en quei discuors: Il ver paun, il paun della veta ei Jesus sez. En scadin cass. «Jeu sun il paun dalla veta», di Jesus. Quei paun vegn daus giu da tschiel, sco la manna al pievel gediu el desiert. Sin quei scalem setracta ei buc d’in discuors eucaristic. Mo era cu ei setracta d’in tal discuors, stat buca l’eucaristia sco tala el center, mobein che Jesus, siu viver e murir, ei il paun ch’il cartent drova el desiert dil mund e della veta. Sa sch’ils auditurs han capiu quei, vul dir ch’els ston «assimilar» Jesus en lur veta – forsa pli fetg: vegnir «assimilai» dad el? Sa sche nus capin quei? Ed empruein da cuntonscher l’«autra riva»?

Gn 6,24–35

24Cura che la glieud ha viu che ni Jesus ni ses giuvnals fuvan leu, ein els sezs i ellas barcas, ein navigai a Cafarnaum ed han encuretg Jesus. 25Els han anflau el sin l’autra riva dalla mar ed han dumandau el: Rabbi, cu eis ti vegnius neu cheu? 26Jesus ha dau per risposta: Pilver, pilver, jeu ditgel a vus: Vus encuris mei buca perquei che vus veis viu enzennas, mobein perquei che vus veis magliau dils pauns ed essas vegni saziai. 27Buca sestentei per la spisa che va en mal, mobein per la spisa che resta per la veta perpetna, la spisa ch’il Fegl dil carstgaun vegn a dar a vus. Pertgei quel ha Dieus il Bab confirmau cun siu sigil. 28Cheu han ei dumandau el: Tgei stuein nus far per ademplir las ovras da Diu? 29Jesus ha rispundiu: Vus fageis I’ovra da Diu, sche vus carteis en quel ch’el ha tarmess. 30Els han rispundiu: Tgei enzenna fas ti pia, che nus veseien e saveien crer a ti? Tgei prestas ti? 31Nos perdavons han magliau il manna el desiert, sco quei ch’ei stat scret: Paun giu da tschiel ha el dau da magliar ad els.

32Jesus ha detg ad els: Pilver, pilver, jeu ditgel a vus: Buca Moses ha dau a vus il paun giu da tschiel, mobein miu Bab dat a vus il ver paun giu da tschiel. 33Pertgei il paun da Diu ei quel che vegn giu da tschiel per dar veta al mund. 34Cheu han ei detg ad el: Segner, dai a nus adina quei paun! 35Jesus ha rispundiu: Jeu sun il paun dalla veta. Tgi che vegn tier mei, vegn buc a ver fom pli, e tgi che crei en mei, vegn mai a ver seit pli.

Download
Versiun per stampar
Onn current 18 B.pdf
Adobe Acrobat Dokument 54.5 KB