da Flurina Cavegn-Tomaschett
Igl evangeli raquenta dad ina miracla da Jesus; gia la secunda ch’el fa en la Decapolis, la tiara dils pagauns. Igl evangelist Marc vul far attents, che Jesus surmunta cunfins religius, ch’el vul era animar ils carstgauns ch’ein buca d’origin giudaic da sesarver per Diu e siu reginavel.
Jesus pren il suord e met ord la fuola. Aschia sa el dar tutta attenziun a siu visavi. El vegn datier al carstgaun, metta maun vid el, pren part da sia sort. Enten mirar encunter tschiel seligia Jesus en siu far e plidar cun Diu.
Cun in act che para a nus empau jasters (metter il det en l’ureglia e spidar sin la lieunga) vegn il suord e met medegaus. La spida era enconuschenta sco remiedi e dueva tener naven il nausch.
Il camond da sesarver «effata» ei era vegnius daus a nus duront il batten. Buca mo nossas ureglias, mobein era nies cor duei sesaver; schibein pil plaid da Diu sco era per quel dil concarstgaun. En consequenza dil tedlar vegn lu era nossa lieunga sligiada per annunziar Diu e sia buna scaffiziun, aschia sco ils giuvnals fan quei alla fin digl evangeli.
Mc 7,31–37
31Bandunond puspei la cuntrada da Tirus, eis el vegnius tras Sidon viers la mar da Galilea, permiez tras il territori dalla Decapolis. 32Ed ins ha menau tier el in suord e met e rugau el d’imponer il maun a quel. 33Prendend el d’ina vart, naven dalla fuola, ha Jesus tschentau sia detta ellas ureglias ad el e tuccau sia lieunga cun spida. 34Lu, alzond ils egls encunter tschiel, ha el dau in schem e detg: Effata; quei vul dir: Sesarva! 35Ed immediat ein sias ureglias s’aviartas, ed il ligiom da sia lieunga ei sesligiaus, ed el ha saviu plidar endretg. 36E Jesus ha scumandau ad els da raquintar quei fatg ad enzatgi; mo pli ch’el scumandava e pli ch’els fagevan paleis. 37Orda sesezs dil smarvegl schevan ei: Tut las caussas ha el fatg bein: El fa udir ils suords e plidar ils mets.
