dad Ursicin G. G. Derungs-Bartolomei
Cu papa Pius XI ha introduciu la fiasta de Cristus retg igl onn 1925 mava quei encunter il laicissem liberal dil temps ed il faschissem. Omisdus, schebi en moda differenta, sepatrunavan della famiglia, della societad e dil stadi. Cun rituals quasi religius, ni cun snegar il spért religius. La nova fiasta denton, quella de Cristus retg, corunava igl onn ecclesiastic, e metteva in ferm accent encunter la nova religiun che vuleva sepatrunar dil temps, dil calender, della veta dils singuls.
Egl evangeli de questa dumengia di Jesus a Pilatus: Jeu sun in retg. Mo miu reginavel ei buca de quest mund. Tgei ch’ei manegiau cun esser retg, di el sez: «Jeu sun vegnius per dar perdetga della verdad» (Gn 18,37). Mo tgei ei verdad? Nus essan ual aschi perplexs sco Pilatus en fatscha a quella damonda. Quei para tut solemn ed abstract. Mo la verdad ei Jesus sez, en siu viver, si’ovra, ses plaids. El dat perdetga della verdad de sia veta cun buc untgir da truament e mort. Retg eis el cun dar quella perdetga. Paleisa vegn la verdad de sia veta ella levada. Consequentamein ei siu reginavel buca de quest mund. Mo el ei pli ferms ch’il «mund». «Haveies fidonza: jeu hai surventschiu il mund» (cf. Gn 16,33).
Gn 18,33b–37
33bPilatus […] ha clamau Jesus e dumandau el: Eis ti il retg dils Gedius? 34Jesus ha rispundiu: Damondas ti quei da tei ano, ni han auters raquintau a ti da mei? 35Pilatus ha rispundiu: Sun jeu forsa in Gediu? Tiu agen pievel ed ils premsacerdots han surdau tei a mi. Tgei has commess? 36Jesus ha rispundiu: Miu reginavel ei buca da quest mund. Sche miu reginavel fuss da quest mund, vessen mes survients battiu, per che jeu vegni buca surdaus als Gedius. Mo miu reginavel ei buca da quest mund. 37Pilatus ha detg: Eis ti pia in retg? Jesus ha rispundiu: Igl ei sco ti dias; jeu sun in retg. Jeu sun naschius e vegnius el mund per dar perdetga dalla verdad. Scadin che ei ord la verdad, teidla mia vusch.
