da sur Martin Bearth
En quei raquent digl evangelist Lucas stat il plaid «encurir» duas gadas. Ils geniturs da Jesus han stuiu encurir lur affon duront treis dis ed anflau el la finala el tempel. Per mei ei quei sco ina semeglia che vul dir a nus, ch’era nus stuein encurir, encurir Jesus, encurir Diu. Ei dat muments e situaziuns en nossa veta, nua che nus vein l’impressiun che nus veien piars Jesus, piars era Diu, ch’el laschi nus persuls, bandunai e trumpai. Nua anflein nus puspei el? Giusep e Maria han anflau Jesus el tempel. Era per nus ei la casa da Diu in liug nua che nus savein udir siu plaid, star a meisa cun el, clamar tier el. Jeu hai fatg l’experientscha ch’era ina egliada anavos en mia veta vargada muossa che Dieus ei staus cun mei, adina puspei e ch’el vegn era vinavon ad esser presents. Ina legenda raquenta che Dieus hagi era schau anavos treis segirs fastitgs da sia preschientscha sin tiara: Las steilas, las flurs ed ils egls sereins dils affons pigns. Gie, el ha schau anavos bia dapli fastitgs sin nies mund. Nus stuein mo arver nos egls e nos cors persuenter. Era ina buna harmonica famiglia ei in clar fastitg da Diu.
Lc 2,41–52
41Ses geniturs mavan mintg’onn per la fiasta da Pastgas si Jerusalem. 42Cura ch’el ha giu dudisch onns, ein els vegni si Jerusalem tenor l’isonza dalla fiasta. 43Vargai ils dis, ein els semess sin via encunter casa, ferton ch’igl affon Jesus ei restaus a Jerusalem, senza che ses geniturs s’encorschien. 44Cartend ch’el seigi en cumpignia dils pelegrins, han els fatg in di viadi ed encuretg el denter ils parents ed enconuschents. 45Nunanflond el, ein els turnai si Jerusalem ed han encuretg el leu. 46Suenter treis dis han ei anflau el el tempel. EI seseva enamiez ils mussaders, tedlava ed emparava els. 47Mo tut quels che udevan el sesmarvigliavan da sia intelligenza e da sias rispostas. 48Cura che ses geniturs han viu el, ein els stai tut stui, e sia mumma ha detg ad el: Affon, pertgei has fatg quei cun nus? Uarda, tiu bab e jeu vein encuretg tei cun anguoscha. 49Cheu ha el detg ad els: Pertgei veis encuretg mei? Savevas buca che jeu stoi esser en quei ch’ei da miu Bab? 50Mo els han buca capiu il plaid ch’el veva detg ad els. 51El ei lu ius engiu cun els e vegnius a Nazaret e staus suttamess ad els. E sia mumma ha manteniu tut quels schabetgs en siu cor. 52E Jesus carscheva e fageva progress ella sabientscha ed ella grazia avon Diu ed avon ils carstgauns.
