da sur Marcus Flury
Simon Pieder era in pescadur da professiun. Mo quella notg ein las reits stadas vitas ed el sa ch’ei ha atgnamein buca senn da vuler empruar aunc inaga, surtut buca duront il di nua ch’ils pèschs ein plitost giu el profund dil lag.
En quella situaziun damonda Jesus da Pieder dad ir aunc inaga viado sil lag ed empruar. Jesus damonda quei da Pieder suenter ch’el ha instruiu las fuolas dalla barca anò. Ei vesa ora sco sch’el less ussa metter sin emprova la cardientscha da Pieder. Lez sco versau pescadur di a Jesus: «Tenor nossas experientschas ha ei buca senn.» Mo el di era: «Sin tiu plaid vi jeu fierer ora las reits» ed el navighescha aunc inaga viado e la raccolta ei gronda. La fidonza en Jesus ha purtau success.
Lucas raquenta quei eveniment per far curascha alla giuvna Baselgia che piteva sut persecuziuns, che veva piars empau il slonsch dils emprems dis e che veva buca quei success ch’ella vess giu bugen. Als emprems cartents vegn cheutras detg: Buca schei pender la bratscha. Mei viado ed empruei sil plaid da Jesus enzatgei che va forsa buc a prau cun vossas experientschas. Quei di el era a nus!
Lc 5,1–11
1In di sefultscheva il pievel entuorn el per tedlar il plaid da Diu, e Jesus steva alla riva dil lag da Gennesaret. 2Cheu vesa el duas barcas alla riva dil lag. Ils pescadurs eran descendi e lavavan las reits. 3El va en ina dallas barcas che udeva a Simon e supplichescha el da navigar in tschancun naven dalla riva. Lu sesa el ed instruescha las fuolas dalla barca ano.
4Havend finiu da plidar, di el a Simon: Navighescha viado sigl ault dalla mar; leu feri o vossas reits per la pesca! 5Cheu rispunda Simon ad el: Mussader, l’entira notg essan nus sestentai e vein pigliau nuot. Mo sin tiu plaid vi jeu fierer ora las reits. 6Ed ei fan quei e peglian in grond diember pèschs. Lur reits entscheivan gia a scarpar. 7Cheu dattan ei in segn a lur cumpogns da vegnir e gidar. Quels vegnan, ed els empleinan domisduas barcas, aschizun ch’ellas bunamein sfundran. 8Vesend quei, sefiera Simon Pieder avon ils peis da Jesus e di: Va naven da mei, Segner, pertgei jeu sun in carstgaun puccont! 9Tema veva surpriu el e tut ses cumpogns pervia dalla pescada ch’els vevan fatg; 10medemamein era Giachen e Gion, ils fegls da Zebedeus, che fuvan cun Simon. Mo Jesus di a Simon: Buca tema! Dad ussa naven vegns ti ad esser pescadur da carstgauns. 11Ed els han tratg las barcas a riva, han bandunau tut ed ein suandai el.
