da Maria Cristina Derungs-Bartolomei
Quei Evangeli ei la versiun de s. Lucas dil «Priedi sil cuolm», il coc della «buna nova» de Jesus. Buca per nuot ei quei priedi vegnius numnaus la «Magna Charta», la «Constituziun» dil reginavel de Diu.
La «buna nova» de Lucas cuntegn 4 beadadas ed en parallel 4 smanatschas. La smanatscha ei ina fuorma retorica presenta era en auters loghens della Bibla e dils Evangelis. Siu intent ei de far ins attents ch’ei va cheu per ina caussa fetg seriusa, gie decisiva per la veta de quels che teidlan.
Ferton ch’igl evangeli da Mattiu porscha 8 beadadads e negina smanatscha, plazzond Jesus sil cuolm, muossa Lucas Jesus che descenda dad in cuolm pli ault nua ch’el veva fatg oraziun la notg, cloma ensemen ils giuvnals e sevolva oravontut ad els cun in direct «Beai vus…». Quels «vus» essan era nus. Beai quels che san tedlar quei appell sco sch’ei fuss l’emprema gada, esser surpri e cantar il Magnificat perquei che in niev mund e novas valetas vegnan annunziadas: Liberaziun dal pitir miseria, larmas, violenza, oppressiun, ed era da nies desideri de pussonza, rihezia, success.
Lc 6,17.20–26
17Ensemen cun els ei Jesus descendius e sefermaus en in plaun. In grond diember da ses giuvnals ed ina termenta fuola da glieud dall’entira Giudea, da Jerusalem e dalla riva da Tirus e Sidon fuvan vegni.
20Cheu drezza el sia egliada sin ses giuvnals e di:
Beai vus paupers, pertgei a vus auda il reginavel da Diu.
21Beai vus che veis ussa fom, pertgei vus vegnis saziai.
Beai vus che bargis ussa, pertgei vus vegnis a rir.
22Beai essas vus, sch’ils carstgauns odieschan vus, sch’els sclaudan vus dalla cuminonza, dattan la bucca da vus e prendan a vus il bien num per amur dil Fegl dil carstgaun.
23Selegrei gliez di e saltei, pertgei mirei, vossa pagaglia vegn ad esser gronda en tschiel. Gest aschia han lur perdavons gie era fatg culs profets.
24Mo paupra vus rehs, pertgei vus veis giu vies cunfiert.
25Paupra vus che essas ussa saziai, pertgei vus vegnis ad endirar fom.
Paupra vus che rieis ussa, pertgei vus vegnis a plirar e bargir.
26Paupra vus, sche tut ils carstgauns flatteschan vus, pertgei gest aschia han lur perdavons era fatg culs fauls profets.
