da sur Martin Bearth
Ins anfla gia el Veder Testament fastitgs ch’ei dat ina levada dils morts. Quei vessen Maria Madleina ed ils apostels Pieder e Gion giu da saver, oravontut era perquei che Jesus sez veva plidau in pèr gadas da sia levada. Ussa denton ein els curri, per vegnir pertscharts, tgei che seigi propi daventau cun Jesus. Ed ei han viu la fossa vita ed ils lenzeuls ed il sudari, ed han cartiu. – La levada da mort en veta da Jesus ei il center da nossa cardientscha cristiana. Sogn Paul scriva quei alla pleiv da Corint culs palids: «Sche Cristus ei buca vegnius leventaus, lu ei vossa cardientscha vana. Mo ussa ei Cristus levaus dils morts sco emprem da quels che ruaussan» (1 Cor 15,17.20). Igl ei per nus pelegrins in grond confiert d’astgar crer cun tutta perschuasiun ch’ei dat ina cuminonza dils sogns, la levada dils morts e la veta perpetna, per nos morts e per nus vonzei.
Gn 20,1–9
1Igl emprem di dalla jamna ei Maria Madleina vegnida la damaun ch’ei fuva aunc stgir sin fossa ed ha viu ch’il crap era dustaus dalla fossa. 2Cheu eis ella currida e vegnida tier Simon Pieder e l’auter giuvnal, quel che Jesus carezava, ed ha detg ad els: Ei han priu il Segner ord fossa, e nus savein buca, nua ch’ei han mess el. 3Sinquei ein Pieder e l’auter giuvnal i giuado ed ein arrivai alla fossa. 4Domisdus currevan ensemen, mo l’auter giuvnal ei currius ordavon a Pieder ed arrivaus igl emprem alla fossa. 5El ei staus giudavon ed ha viu ils lenzeuls giun plaun mo ei buc ius viaden. 6Uss ei era Simon Pieder che suandava el arrivaus ed entraus ella fossa. El ha viu ils lenzeuls giun plaun 7ed il sudari, cul qual il tgau da Jesus era staus cuvretgs; quel fuva denton buca sper ils lenzeuls, mobein zugliaus ensemen en in liug dapersei. 8Uss ei era l’auter giuvnal che fuva vegnius igl emprem alla fossa ius viaden; el ha viu e cartiu. 9En verdad vevan els aunc buca capiu ch’el stoppi, tenor la Scartira, levar da mort en veta.
