· 

3. dumengia da pastgas (C)

da Flurina Cavegn-Tomaschett

Igl evangeli raquenta dad ina appariziun da Jesus suenter il schabetg da Pastgas. La sentupada vegn descretta aschia, ch’ella tschenta certs accents pil temps vegnent, quel dils emprems cristians e dallas empremas cuminonzas, nua che la Baselgia entscheiva a seformar. Jesus Cristus cloma siat da ses giuvnals el survetsch, quei che semuossa en la simbolica entuorn il pescar. Senza il sustegn ed accumpignament da Cristus, ei la pesca dils giuvnals buc reussida. Pér la lavur tenor las ordras da Diu portan fretg.

Punct culminont dalla sentupada denter Jesus Cristus e ses giuvnals ei la tschavera, nua ch’ils giuvnals enconuschan tgi che sesa cun els a meisa. La tschavera duei anflar cuntinuaziun en la celebraziun dall’eucaristia.

Pieder gioga in’impurtonta rolla en l’entira passascha digl evangeli. Siu dafar ei buc adina schi logics. Aschia trai el per exempel en siu vestgiu avon che siglir ell’aua, quei che sa vegnir interpretau a differenta moda! Pli clara ei sia incarica da pascular las nuorsas. La simbolica muossa vi sin siu impurtont pensum sco pastur el survetsch dalla Baselgia, nua ch’el vala sco emprem Papa. La damonda a Pieder, schebein el carezi Jesus Cristus, vegn repetida treis ga e trai in artg tier sia treidubla snegaziun els fatgs entuorn la passiun.

Gn 21,1–19

1Silsuenter ei Jesus cumparius aunc inaga als giuvnals. Ei fuva sper la mar da Tiberias, ed el ei semussaus aschia: 2Simon Pieder, Tumasch, numnaus Schumellin, Natanael da Cana en Galilea, ils fegls da Zebedeus e dus auters da ses giuvnals fuvan ensemen. 3Simon Pieder ha detg ad els: Jeu mon a pescar. Els han detg ad el: Era nus vegnin cun tei. Els ein i viado ed ella barca; mo quella notg han ei pigliau nuot. 4Ei fageva gia dis, che Jesus steva alla riva; mo ils giuvnals savevan buca ch’ei seigi Jesus. 5Jesus ha detg ad els: Mes affons, veis buca zatgei da magliar? Els han rispundiu: Na. 6Cheu ha el detg ad els: Feri o la reit da vart dretga dalla barca, e vus piglieis enzatgei. Els han fiers o la reit, mo pudevan buca trer siado ella pli; aschi gronds era il diember da pèschs. 7Il giuvnal che Jesus carezava ha detg a Pieder: Quei ei il Segner. Udend ch’ei seigi il Segner, ha Simon Pieder tratg en siu vestgiu suren, pertgei el fuva nius, ed ei siglius ella mar. 8Ils auters giuvnals ein vegni cun la barca, targend suenter la reit cun ils pèschs; pertgei ch’els fuvan buca lunsch naven dalla riva, mo entuorn duatschien bratscha. 9Vegnend a riva, han ei viu burnida ed in pèsch sissu e dasperas paun. 10Jesus ha detg ad els: Dei neu zacons pèschs che vus veis ual pigliau! 11Simon Pieder ei ius ella barca ed ha tratg a riva la reit che fuva emplenida cun 153 gronds pèschs. Malgrad ch’ei fuva tons, ei la reit buca scarpada. 12Jesus ha detg ad els: Vegni e magliei! Buc in dils giuvnals ha ughegiau da dumandar el: Tgi eis ti? pertgei els savevan ch’ei seigi il Segner. 13Jesus ei ius ed ha priu il paun e dau ad els, medemamein ils pèschs. 14Quei ei stau gia la tiarza ga che Jesus ei cumparius als giuvnals suenter esser levaus da mort en veta.

15Suenter la tschavera ha Jesus detg a Simon Pieder: Simon, fegl da Gion, carezas ti mei pli fetg che quels? EI ha rispundiu: Gie, Segner, ti sas che jeu carezel tei. Jesus ha detg ad el: Pasculescha mes tschuts! 16E per la secunda ga ha Jesus dumandau el: Simon, fegl da Gion, carezas mei? EI ha rispundiu: Gie, Segner, ti sas che jeu carezel tei. Jesus ha detg ad el: Pasculescha mias nuorsas! 17Per la tiarza ga ha Jesus dumandau el: Simon, fegl da Gion, carezas mei? Cheu ei Pieder vegnius trests, perquei che Jesus veva dumandau el per la tiarza ga: Carezas mei? EI ha rispundiu: Segner, ti sas tut, ti sas che jeu carezel tei. Jesus ha detg ad el: Pasculescha mias nuorsas! 18Pilver, pilver, jeu ditgel a ti: Cura che ti fuvas pli giuvens, mettevas ti tez la tschenta entuorn veta e mavas, nua che ti levas. Mo cura che ti eis vegls, vegns ti a stender o tia bratscha, ed in auter vegn a metter la tschenta entuorn veta a ti e menar tei, nua che ti vul buc. 19Quei ha Jesus detg per dar d’entellir cun tgei mort ch’el vegni a glorificar Diu. Suenter quels plaids ha el detg ad el: Suonda mei!

Download
Versiun per stampar
Pastgas 3 C.pdf
Adobe Acrobat Dokument 94.5 KB