· 

6. dumengia da pastgas (C)

dad Ursicin G. G. Derungs-Bartolomei

La cuminonza digl evangeli de Gion entuorn ils onns 100 s. Cr. sedamonda: «Nua ei Jesus ius?» Perquei stat siu cumiau el center dils discuors della davosa tscheina. Mo igl evangeli de Gion gioga era cheu cun in paradox: Mia partenza ei in niev retuorn, definitiv; quei ei exprimiu cun l’empermischun: «nus vegnin e prendein avdonza».

«Nus»: il Bab e Jesus che plaida. Savens stat è il plaid «restar»: entrar en relaziun e cuminonza de veta. E quei ei il medem sco «carezar»: «tgi che careza mei, vegn ad observar miu plaid; miu Bab vegn a carezar el, e nus vegnin tier el e prendein avdonza tier el». «Carezar» stat buca sut la categoria moralistica da camonds e scamonds, ni sut quella da cundiziuns sco en in contract. Carezia ei ina purschida nunmeritada, ina purschida de veta che vegn cheu da fetg ault e porta il cartent ella veta sezza de Diu, pertgei «miu Bab vegn a carezar el».

Quei ei ina gronda empermischun, l’empermischun pascala e quella dil «Spert Sogn ch’il Bab vegn a tarmetter en miu num»: Consolader, Paraclet, Gidonter vegn el numnaus. Sia vegnida ei il retuorn de Jesus, ed ei la veta de Jesus e dil Bab en nus. Quei ei la pasch, tgiembel de veta, che negin auter sa dar. – Ei dat strusch zanua in text da pli aulta spiritualitad.

Gn 14,23–29

23Jesus ha rispundiu e detg ad el: Tgi che careza mei, vegn ad observar miu plaid; miu Bab vegn a carezar el, e nus vegnin tier el e prendein avdonza tier el. 24Tgi che careza buca mei, observa buca mes plaids. Ed il plaid che vus udis ei buca mes, mobein dil Bab che ha tarmess mei. 25Quei hai jeu detg a vus, duront che jeu sun aunc cun vus. 26Il Gidonter denton, il Spert sogn ch’il bab vegn a tarmetter en miu num, lez vegn a mussar a vus tut e regurdar vus vida tut quei che jeu hai detg a vus. 27Pasch lasch jeu anavos a vus, mia pasch dun jeu a vus; buca sco il mund dat pasch, dun jeu pasch a vus. Vies cor duei buca sestermentar e temer. 28Vus veis udiu che jeu hai detg a vus: Jeu mon naven e tuornel tier vus. Sche vus carezasses mei, selegrasses vus che jeu mon tier il Bab; pertgei il Bab ei pli gronds che jeu. 29Ed ussa hai jeu detg ei a vus, avon ch’ei daventi, per che vus carteies, cura ch’ei daventa.

Download
Versiun per stampar
Pastgas 6 C.pdf
Adobe Acrobat Dokument 87.3 KB