· 

7. dumengia da pastgas (C)

da sur Marcus Flury

Unitad ei in plaid ch’ins auda savens en baselgia. Oravontut egl evangeli tenor s. Gion vegn el avon numerusas gadas. Sch’ins auda quei plaid, patratg’ins savens vid l’unitad denter las differentas confessiuns cristianas, l’unitad cul papa e culs uestgs, l’unitad en famiglia e.a.v.

Sche Jesus di: «Tuts duein esser units per ch’il mund creigi che ti has tarmess mei», tucca el enzatgei impurtont, numnadamein la verdeivladad da nus cristians. La Baselgia ei pauc verdeivla, sch’ina gruppaziun cun siu pugn da vesta vul prender surmaun per tut prezi ed excommunichescha bunamein ina l’autra e sche la Baselgia consumescha bia forzas per cumbats interns.

«Tuts duein esser units!» Mo tgi decida sin tgei ch’ins duei s’unir ed en tgei ch’ins duei esser units? Garant per l’unitad ei Jesus Cristus ed igl instrument che meina ad unitad ei la carezia. Perquei roga Jesus il Bab: «Fai che la carezia, cun la quala ti has carezau mei, seigi en els, e che jeu seigi en els.»

Gn 17,20–26

20Jeu roghel buca mo per els, mobein era per quels che creian en mei tras lur plaid. 21Tuts duein esser units. Sco ti, Bab, eis en mei e jeu en tei, aschia duein era els esser units en nus, per ch’il mund creigi che ti has tarmess mei. 22La gloria che ti has dau a mi hai jeu dau ad els, per ch’els seigien units, sco nus essan units: 23Jeu en els e ti en mei. Els duein esser dil tuttafatg units, per ch’il mund vegni pertscharts che ti has tarmess mei e che ti has carezau els, sco ti has carezau mei. 24Bab, jeu vi che tut quels che ti has dau a mi seigien leu, nua che jeu sun; els duein veser mia gloria che ti has dau a mi, perquei che ti has carezau mei avon l’entschatta dil mund. 25Gest Bab, il mund ha buc enconuschiu tei, mo jeu hai enconuschiu tei, ed els ein seperschuadi che ti has tarmess mei. 26Jeu hai fatg enconuschent ad els tiu num e vegn a far enconuschents el vinavon, sinaquei che la carezia, cun la quala ti has carezau mei, seigi en els, e per che jeu seigi en els.

Download
Versiun per stampar
Pastgas 7 C.pdf
Adobe Acrobat Dokument 87.4 KB