dad Andri Casanova-Baumgartner
Siatontadus auters, pia buc ils dudisch apostels, ein i ordavon a Jesus ed han preparau la via ad el ed a siu messadi. Quei ein buc mo in pèr paucs eligi, anzi, in grond diember ei clamaus. E quels siatontadus ein i dus a dus, pia da cuminonza. Quei dat peisa a lur missiun, mo quei pretenda era in agir communabel.
Nua ch’ils siatontadus ein exactamein i, rapporta igl evangeli buc. Pli impurtont ei ch’els ein i tier carstgauns. En marcaus e vitg han els encuriu igl inscunter cun carstgauns. Els ein i per preparar la via a Jesus, per purtar la buna nuviala, denton senza sforz. Els han dau aviartamein perdetga ed han schau la libertad al visavi.
Quei evangeli descriva in’episoda duront il viadi da Jesus e ses giuvnals e giuvnalas sin via a Jersualem. El dat plinavon perdetga dils emprems cristians e lur missiun. E la finala dat el a nus sempels cussegls per purtar viado la nuviala.
Lc 10,1–12.17–20
1Silsuenter ha il Segner aunc destinau siatontadus auters ed ha tarmess els dus a dus ordavon ad el en mintga marcau e mintga liug, nua ch’el sez veva el senn da vegnir. 2El ha detg ad els: La raccolta ei gronda, mo luvrers eis ei paucs. Rughei pia il patrun dalla raccolta da tarmetter luvrers per sia raccolta. 3Sche mei pia! Mirei, jeu tarmettel vus sco tschuts enamiez ils lufs. 4Prendei cun vus ni buorsa, ni valischa ni calzers; e salidei negin sin via. 5Entrond en ina casa, schei igl emprem: Pasch a questa casa! 6Sesanfla leu in fegl dalla pasch, sche vegn vossa pasch a ruassar sin el; cass cuntrari vegn ella a turnar tier vus. 7En ina tala casa restei, magliei e buei quei ch’ei han; pertgei il luvrer ei merets da sia pagaglia. Buca mei d’ina casa en l’autra. 8E sche vus vegnis en in marcau, ed ins accepta vus, magliei quei ch’ei porschan a vus; 9medeghei ils malsauns ch’ein leu e schei ad els: Il reginavel da Diu ei s’avischinaus a vus. 10Mo sche vus vegnis en in marcau, ed ins accepta buca vus, mei ora sillas plazzas e schei: 11Perfin la puorla da vies marcau ch’ei taccada vid nos peis, furschein nus giu per schar a vus. Mo ton saveies: Il reginavel da Diu ei vegnius neutier. 12Jeu ditgel a vus: Gliez di vegn ei ad ir meglier cun Sodom che cun in tal marcau.
17Ils siatontadus ein returnai plein legria ed han detg: Segner, perfin ils demunis ein suttamess a nus en tiu num. 18El ha detg ad els: Jeu hai viu il satan a curdond giu da tschiel sco in cametg. 19Jeu hai dau a vus la pussonza da passar sin siarps e scorpiuns e pussonza sur da mintga forza adversaria, e nuot duei puder far donn a vus. 20Mo buca da quei selegrei ch’ils spérts ein suttamess a vus; selegrei plitost che vos nums ein enscrets en tschiel.
