· 

4. dumengia d’advent (A)

da Flurina Cavegn-Tomaschett

Davart Giusep, il bab nutrider da Jesus, udin nus buca savens els texts biblics. El ei il quiet e met accumpignader da Maria. Quest evangeli raquenta dil siemi da Giusep e dat aschia perdetga, co era el ei staus pertuccaus dalla sort da Maria. Per el ei la situaziun buca stada sempla, segiramein eis el staus mudergiaus da bia damondas e profunds dubis.

Aschia sco tier Maria, ha Dieus era tarmess tier Giusep in aunghel cun in messadi pil futur. Auter che tier Maria cumpara quei aunghel denton el siemi. Igl aunghel da Giusep vegn era buca numnaus cun num. Tuttina ei era quella scuntrada da gronda impurtonza: Ella pren la tema da Giusep e dat ad el curascha da dir GIE a quei che Dieus ha previu cun el. Tut quei ei buca sempel da capir. Ils fatgs vegnan daveras avon sco en in siemi.

Mt 1,18–24

18Cun la naschientscha da Jesus eis ei stau aschia: Cura che Maria, sia mumma, era s’empermessa cun Giusep, eis ei semussau gia avon ch’els vegnien ensemen ch’ella era purtonta entras il Spert sogn. 19Mo Giusep, siu um, ch’era gests e leva buca metter ella en zanur, patertgava da relaschar ella discusamein. 20Ferton ch’el ponderava quei, ei in aunghel dil Segner cumparius ad el en siemi ed ha detg: Giusep, fegl da David, buca tema da prender tier tei Maria, tia dunna, pertgei quei ch’ei schendrau enten ella, deriva dil Spert sogn. 21Ella vegn a parturir in fegl e ti dueis metter num Jesus ad el, pertgei el vegn a spindrar siu pievel dils puccaus. 22Tut quei ei daventau, per ch’il plaid dil Segner secumpleini. Pertgei il Segner ha plidau tras il profet:

23Uarda, la giuvna vegn a concepir e parturir in fegl,

ed ins vegn a dar num ad el «Immanuel»,

quei vul dir: Dieus cun nus.

24Cura che Giusep ei sedestadaus ha el fatg sco igl aunghel dil Segner veva cumandau ad el ed ha priu sia dunna tier el.

Download
Versiun per stampar
Advent 4 A.pdf
Adobe Acrobat Dokument 85.0 KB