da sora Maria Vincenz
Igl evangeli dad oz fa l’avertura dalla veta publica da Jesus. Igl evangelist tschenta quella el connex cul Veder Testament, cun la profezia dil profet Jesaja: «… il pievel … vesa ina gronda glisch …». Jesus, la glisch dil mund, il qual porta salit e spindrament als carstgauns entochen ils cunfins dil mund, ei vegnius. Jesus da Nazaret vegn attestaus e confirmaus sco Messias, tarmess en num da Diu. A Cafarnaum, sper il lag da Genesaret, ina cuntrada plitost paupra, entscheiva Jesus sia via e missiun: «Midei patratg, pertgei il reginavel da tschiel ei damaneivel!» El rimna carstgauns entuorn el, cun ils quals e vul eregier il reginavel da tschiel e per che la profezia da Jesaja vegni ademplida. Ils carstgauns, ils quals el enquera ora ein buca teologs ni umens pietus, mobein umens sempels, pescadurs. Jesus plidenta quels, senza gronda elecziun. Il mument ei decisivs. Buca ina qualificaziun vegn pretendida, mobein il suandar il clom immediat e cu negin spetga: «Suandei mei…!» Cheu entscheiva il reginavel da tschiel!
Cun la vegnida da Jesus entscheiva pia enzatgei niev. Sco Dieus ei vegnius da tschiel ed ha purtau glisch el stgir dil mund e dil carstgaun, aschia cloma el era nus. Nus essan oz ed ussa plidentai – Ti ed jeu! – da semetter sin via, sin via cun el: «Suandei mei!»
Mt 4,12–23
12Udend Jesus, che Gion seigi vegnius mess a ferm, eis el turnaus en Galilea. 13El ha bandunau Nazaret ed ei vegnius a star a Cafarnaum (il marcau) sper il lag, ella cuntrada da Sebulon a Naftali. 14Aschia dueva secumplenir quei ch’il profet Jesaja veva annunziau:
15Tiara da Sebulon e tiara da Naftali,
via maritima da l’autra vart dil Jordan,
Galilea dils pagauns!
16Il pievel che sesanfla ella stgiradetgna ha viu ina gronda glisch,
a quels che habiteschan en la regiun e stgiradetgna dalla mort,
ei cumparida ina glisch.
17Da cheu naven ha Jesus entschiet a perdegar a dir: Midei patratg e seconverti, pertgei il reginavel da tschiel ei damaneivel.
18Viandond suenter la mar da Galilea vesa el dus frars: Simon che vegn numnaus Pieder e siu frar Andriu. Els frevan ora la reit ella mar, pertgei els eran pescadurs. 19Ed el di ad els: Suandei mei, e jeu vi far orda vus pescadurs da carstgauns. 20Immediat han els bandunau las reits ed ein suandai el. 21Mond da leu vinavon vesa el dus auters frars: Giachen, il fegl da Zebedeus, e siu frar Gion. Quels eran cun lur bab Zebedeus ella barca e cuntschavan lur reits. Ed el cloma els. 22Immediat han els bandunau la barca e lur bab ed ein suandai el.
23Jesus ei viandaus per tut la Galilea ed ha instruiu en lur sinagoga, proclamond la buna nova dil reginavel e medegond mintga malsogna e mintga fleivlezia el pievel.
