da Flurina Cavegn-Tomaschett
Igl evangeli ei ina cumpart dil priedi sil cuolm. El pretenda bia da nus: carezar nos inimitgs, buca far resistenza al mal e parter senza calar.
Entras quels exempels vul Jesus mussar a nus in’autra pusseivladad da s’inscuntrar cun nos concarstgauns; buca gest in’usitada. El muossa a nus da cumbatter il mal a moda creativa.
Il carezar il proxim ei in segn pigl esser affon da Diu. Tgi che astga esser segirs dalla carezia da Diu, il Bab, sto buca reagar cun odi e vendetga per spindrar l’atgna honur. Entras la reacziun nunusitada vegn la spirala da vendetga e violenza interrutta.
Mt 5,38–48
38Vus veis udiu ch’igl ei vegniu detg:
Egl per egl e dent per dent!
39Mo jeu ditgel a vus: Buca fagei resistenza al mal! Il cuntrari, sch’enzatgi dat a ti sin la vesta dretga, tegn vi era l’autra! 40E sch’enzatgi vul far process cun tei ed ir cun tiu vestgiu, sche lai era tiu manti ad el. 41Vul enzatgi sfurzar tei da far melli pass cun el, sche fai duamelli! 42A quel che roga tei, dai, e buca volva il dies a quel che damonda in emprest!
43Vus veis udiu ch’igl ei vegniu detg:
Ti dueis carezar tiu proxim ed odiar tiu inimitg.
44Mo jeu ditgel a vus: Carezei vos inimitgs ed urei per quels che persequiteschan vus. 45Aschia daventeis vus affons da vies Bab en tschiel, pertgei el fa levar siu sulegl sur buns e schliats, el fa plover sur gests e malgests. 46Sche vus carezeis numnadamein mo quels che carezan vus, tgei pagaglia meriteis lu? Fan buc era ils publicans quei? 47E sche vus salideis mo vos frars, tgei fageis lu aparti? Fan buc era ils pagauns il medem? 48Seigies pia perfetgs sco vies Bab en tschiel ei perfetgs!
