tenor pader Nikolaas Sintobin SJ
Cars avdonts da questa tiara,
Sco jeu vesel, fageis Vus vess d’anflar la dretga tenuta en vesta alla pandemia dil coronavirus. La scienzia ha fatg ils davos decennis tals svilups che Vus carteis che mintga problem sa vegnir sligiaus en cuort temps. Ussa semuossa ei denton sigl entir mund che quei ei in’illusiun. Per beinenqualin eis ei en emprema lingia irritont.
Jeu mez hai giu da cumbatter varga trenta onns cun malsognas cronicas. Sco parsura general digl uorden gesuit sun jeu staus confruntaus duront quendisch onns gi per gi cun problems nunprevisibels. Bugen less jeu porscher a Vus quater cussegls per dar damogn a quei temps. Els derivan da mias atgnas experientschas.
1. Stei obedeivels duront la pandemia als miedis, als scienziai ed allas autoritads cumpetentas, sco sch’ei fuss Dieus sez. Era sche Vus essas buca perina cun tut lur decisiuns ni sche vus capis buc ellas. Haveies la humilitonza d’acceptar ch’igl ei meglier da sefidar da lur savida ed experientscha. Quei vegn a rinforzar Vies senn da responsabladad e pussibilitar da contribuir il Vies alla superaziun dalla crisa.
2. Attenziun dalla tema. Pertgei la tema deriva mai da Diu e meina era buca tier Diu. La tema vul adina illustrar da tuttas sorts motivs, daco che Vus stuesses sestermentar. Franc ein ils motivs per gronda part giustificai. Denton, Vus stueis buca ver tema dad els. Il Segner s’empatscha era ussa da Vus. Quei sai jeu confirmar garzia ad ina fontauna beininformada giu da tschiel. L’experientscha ha mussau ch’El sa scriver uliv, leu nua che lingias terrestras ein uiarschas.
3. En temps da crisas ei l’oraziun buca meins impurtonta, anzi, ella ei aunc pli impurtonta che schiglioc. Fagei valer Vies dretg da sesurdar cumpleinamein a Sia carezia. Quei ei il meglier mied encunter la tema.
4. E la finala, buc emblidei en l’entira truscha da viver e da guder la veta. Tut quei che capeta e mintga secunda ch’ei regalada a Vus, ei in regal unic e prezius. Vida quei sa era il coronavirus midar zun nuot.
Unius en oraziun cun Vus
+ Ignazi
19 da mars 2020
