· 

19. dumengia ordinaria (A)

da Flurina Cavegn-Tomaschett

Egl evangeli da questa dumengia legin nus dil viandar sin la mar resp. sur il lag da Gennesaret. Ferton ch’era ils evangelists Marc e Gion raquentan che Jesus seigi viandaus sin l’aua, scriva sulettamein Mattiu dall’emprova da Pieder, da medemamein passar sur l’aua vi. Sco ei para, stueva quei raquent esser impurtonts per las pleivs dall’emprema generaziun e medemamein eis ei stau impurtont per Mattiu dad era schar prender part Pieder da quellas habilitads divinas. Igl evangelist dat pia gronda peisa sin la clamada extraordinaria da Pieder.

Il raquent biblic cuntegn in grond scazi da simbols: l’aua, las undas, la barca, la notg, il cuntervent. Mintgin dad els purschess plaz per interpretaziun e profundaziun. Els tuts porschan agid per far veseivla la cardientscha. Ferton ch’il crer ei in fatg e sentiment che selai normalmein buca miserar e demonstrar, gida il text biblic a far veseivla la cardientscha. Aschia sco Pieder vegnin era nus savens mess sin l’emprova da cardientscha. Con savens havein era nus il sentiment da sfundrar en la mar dalla malsegirtad e tema. Con consolont eis ei da saver dad in che tonscha a nus il maun: Jesus Cristus.

Mt 14,22–33

22Ed immediat ha Jesus fatg ir ils giuvnals ella barca e navigar ordavon ad el vi da l’autra vart, ferton ch’el leva relaschar il pievel. 23E cura ch’el ha giu relaschau las fuolas, eis el ius sil cuolm tut persuls per urar. Ei ha fatg sera, ed el era leu persuls. 24La barca fuva gia ina toccada naven dalla tiara e vegneva battida dallas undas, pertgei els vevan vent cuntrari. 25La quarta guardia dalla notg eis el vegnius tier els, viandond silla mar. 26Cura ch’ils giuvnals han viu el a viandond silla mar, ein els sesnui, cartend ch’ei seigi in spért. Ed els han entschiet a grir dalla tema. 27Mo immediat ha Jesus plidau cun els e detg: Stei ruasseivels! Jeu sun, buca temei! 28Sinquei ha Pieder priu il plaid e detg: Segner, sche ti eis, camonda a mi da vegnir tier tei sur l’aua vi! 29E Jesus ha detg: Sche neu pia! E Pieder ei sortius dalla barca ed ius sur l’aua vi per vegnir tier Jesus. 30Mo sentend la forza dil vent, ha el temiu, ed entschevend a sfundrar, ha el griu: Segner, spendra mei! 31Immediat ha Jesus stendiu ora siu maun, teniu el e detg: Has ti ina fleivla cardientscha! Pertgei has dubitau? 32E cura ch’els ein stai ella barca, ei il vent tschessaus. 33Quels ch’eran ella barca ein sefiers giu avon el ed han detg: Veramein, ti eis Fegl da Diu!

Download
Versiun per stampar
Onn current 19 A.pdf
Adobe Acrobat Dokument 84.8 KB