da Marcel Köhle
Il profet Elia ei vegnius persequitaus ed ha stuiu fugir ord Israel. Suenter quella fuigia po el buca pli, ha neginas forzas e less murir. Mo en quella situaziun senza speronza retscheiva il profet nunspitgadamein in rinforz celestial: In aunghel porscha ad el paun ed aua. Rinforzaus cun quella spisa semetta Elia sin via ed arriva suenter curonta dis sil Horeb, il cuolm da Diu.
Il text da questa dumengia regorda fetg al text biblic, nua ch’il pievel israelit ei vegnius spisgentaus cun paun celestial (manna) duront il viadi tras il desiert. Mo medemamein regorda quei raquent era al plaid da Jesus: «Jeu sun il paun dalla veta» (Gn 6,35).
Tut quels passadis biblics expriman la fidonza che nies Diu seigi quel che dat a nus adina danovamein il rinforz da star si ed da cuntinuar nies «viadi da veta». Quei patratg po accumpignar nus sche nus retschevein la proxima gada la communiun, il paun celestial.
1 Re 19,4–8
Lezs dis ei Elia ius el desiert, il viadi d’in di. Arrivaus leu, eis el semess sut in geneiver. Giavischond da saver murir, di el: Igl ei avunda! Sche pren ussa mia veta, o Segner; pertgei jeu sun buca megliers che mes perdavons. Lu eis el semess a durmir sut il geneiver.
Mo tuttenina tucca in aunghel el e di: Stai si e maglia! Mirond entuorn, uarda, cheu vesa el sper siu tgau in paun cotg ed in cup aua. Ed el beiba e maglia e semetta puspei a durmir.
E per la secunda ga vegn igl aunghel dil Segner, tucca el e di: Stai si e maglia, schiglioc vegn il viadi ad esser memia liungs per tei. Cheu eis el levaus si, ha magliau e buiu, e lu eis el ella forza da quella spisa viagiaus curonta dis e curonta notgs tochen tier il Horebil cuolm nua che Dieus ei serevelaus a Moses, il cuolm da Diu.
