da sora Armina Maissen
Bien e schliet cumbattan in cun l’auter e quei da tut temps, oz sco gia el Veder Testament. Il nausch serebalza ed il bien sesprova cun fidonza e perseveronza, mo senza violenza d’influenzar e dumignar la nauschadad. Eis ei buca magari in paradox, co carstgauns, che vulan mo dil bien, che vivan la carezia proximala, ston ir atras ton stgir. Lur cardientscha e fidonza vegnan strapazzadas. Eis ei buca admirabel, co els damognan senza resignar?
In tal eveniment descriva la lecziun dad oz: Il drag, la dunna ed igl affon. Jeu vesel en las persunas Maria ed igl affon Jesus. Hai aunc dau zacu «pli buns», «pli digns» carstgauns che Jesus e Maria? Perquei eisi clar, che era il «pli nausch» serebalza. El sa tgei ch’el piarda. Perquei vul el laguoter, mazzar la ragisch dil bien. Maria ha stuiu fugir. Siu desiert ei la perseveronza, sias armas la cardientscha e fidonza en Diu.
Oz festivein nus la fiasta da Maria ch’ei vegnida prida si en tschiel cun tgierp ed olma. Igl ei buca il pli impurtont d’analisar quei misteri. Maria ei nossa gronda intercessura. Ella capescha nus, sa da nos quitaus, da nos cumbats e desideris, da nossas stgiras e bialas uras. Ella ei ida sezza atras tut quels temps ed ei perquei unida cun tschiel e tiara, cun Diu e cun nus carstgauns.
Pal 11,19a; 12,1–6a.10ab
Il tempel da Diu che sesanfla en tschiel ei vegnius aviarts, aschia ch’ins ha viu l’arca dalla ligia en siu tempel. Lu ei in’enzenna imposanta cumparida vid il tschiel: Ina dunnaregina dil tschiel, vestgida cul sulegl, la glina sut ses peis, e sin tgau ina cruna da dudischdudisch schlattas d’Israel steilas. Ella ei purtonta e plonscha pervia dallas deglias e la stenta da parturir. Ed aunc in’enzenna ei cumparida vid il tschiel: Uarda, in terment drag, cotschens sco fiug. El ha siat tgaus e diesch corns e sin ses tgaus siat diadems. Sia cua runa suenter ina tiarza dallas steilas dil tschiel e sdermeina ellas giu sin tiara. Il dragpussonza cuntradivina ei sepustaus avon la dunna che ha da parturir, per ch’el sappi laguoter siu affon, cu ella ha parturiu. Ed ella ha parturiu in affon, in fegl, che vegn a pascular tut ils pievels cun in bastun da fier. Igl affon denton ei immediat vegnius prius naven e purtaus tier Diu e siu tron. La dunna sezza ei fugida el desiertliug da refugi, nua ch’ella ha in albiert, preparaus da Diu. E jeu hai udiu en tschiel ina ferma vusch che clamava: Il salvament e la pussonza ed il domini da nies Diu e la forza da siu Unschiu ein ussa stabili.
☛ evangeli dalla dumengia: Lc 1,39–56
