· 

Fiasta da Nadalnotg (C) – emprema lecziun

dad Ursicin G. G. Derungs

Egl 8avel secul a. Cr. steva il pievel gediu (dil nord) sut il domini jester dils Assirians; quei era sia notg. A quei pievel va il messadi liberont della naschientscha d’in affon che porta giustia e pasch.

Nossa notg: cu nus anflein buca nusezs, essan sepiars.

Domini jester ei tut quei ch’ei buca human; nus essan sut dominis jasters, nunhumans.

A nus che sesperdein pia ella notg, sut il domini d’interess alienonts, vegn la naschientscha d’in affon annunziada. Oz ei quei per nus la naschientscha de Jesus avon 2000 onns.

Affon exponius a tuts prighels, dependents en tut per spindrar nus da nossas dependenzas e far nescher era nus da niev, sco carstgauns, quei che nus essan buc avunda.

Quella notg, la notg dil Nadal de Jesus, ei era protectura; l’affonza sezza ei protegida, perquei ch’ella sveglia tenerezia, calira humana. È quei ei Nadal: la tenerezia de Diu per nus.

Mo adina cu nossa notg ei notg dil dubi, da disfidonza, da desorientaziun, sa è nies temps e nossa cardientscha s’envidar vid il lamegl ardent dell’annunziaziun dil profet: in affon ei daus a nus; siu num ei Diu valerus, prenci da pasch.

Jes 9,1–6

Il pievel che viandescha ella stgiradetgna

vesa ina gronda glisch;

quels che avdan ella tiara d’umbriva mortala,

sur els resplend’ina glisch.

Augmentau has ti la legria

ed has carschentau la letezia;

ins selegr’avon tei

sco quei ch’ins selegra d’ina buna raccolta,

sco ins giubilescha cu ins reparta la preda.

Pertgei il giuv che pesava sin el,

la latta sin sia schuiala,

il bastun da siu catschader,

quei has ti sfraccau sco dil temps da Midiancun agid divin ha in pign trup victorisau a Midian (Der 7).

Pertgei mintga calzer che rebatta el cumbat

ed il mantel runaus tras il saung

vegn barschaus e davent’ina preda dil fiug.

Pertgei a nus ei in affon naschius,

in fegl ei daus a nus.

Sin sia schuiala schai la pussonza,

ins dat ad el il num:

Cusseglier admirabel, Diu valerus,

bab perpeten, prenci da pasch.

Augmentada vegn la pussonza,

e la pasch ha negina fin –

sin il tron da David ed en siu reginavel;

ha el gie francau e susteniu ella cun dretg e giustia

dad uss naven en perpeten.

Quei vegn la premura dil Segner dallas armadas a far.

Download
Versiun per stampar
Nadalnotg C.pdf
Adobe Acrobat Dokument 79.1 KB

☛ evangeli dalla dumengia: Lc 2,1–14