da sur Marcus Flury
Quei text ei in grond laud sin la sabientscha divina. La sabientscha divina sortescha dalla bucca da Diu ed ei cheutras il plaid da Diu ch’exista gia d’entschatta enneu. Quella sabientscha vul penetrar tuts encardens dil mund. Entras siu plaid e sia sabientscha ei Dieus presents en siu pievel, vegn ei gie detg: «Secasa en Jacob ed acquista ina ierta en Israel!» Entras la sabientscha divina vegn il pievel menaus sin la dretga via.
Quei plaid etern divin ei per nus cristians il Vierv da Diu ch’ei daventaus carn. Igl ei Jesus, il Cristus. Quella sabientscha divina ei ussa presenta el niev pievel da Diu. Leu, el possess dil Segner, en siu patrimoni, ha ella pigliau ragisch. Quei vein nus festivau da Nadal.
Sir 24,1–2.8–12
La sabientscha lauda sesezza,
segloriescha enamiez siu pievel.
Ella arva la bucca ella raspada dil Suprem
e segloriescha en vesta da sia pussonza.
Il creatur digl univers ha ordinau a mi,
quel che ha scaffiu mei ha dau ruaus a mia tenda
e detg: Secasa en Jacob
ed acquista ina ierta en Israel!
Avon ils tschentaners, gia dall’entschatta ha el creau mei,
ed en perpeten vegn jeu buc a svanir.
Jeu fetschel survetsch avon el ella tenda sontgail cult el tempel ei pigl autur era ina ovra dalla sabientscha,
ed aschia hai jeu fitgau pei sin il Sion,
anflau ruaus el marcau schi carezau
e fatg diever da mia pussonza a Jerusalem.
En in pievel glorius hai jeu pigliau ragisch,
el possess dil Segner, en siu patrimoni.
