da sur Martin Bearth
Elisa ei propi in profet ch’ei fiug e flomma per siu Diu. Ina dunna intervegn quei, enquera contact cun quei curaschus um da Diu, envida el en sia casa ed a meisa e procura schizun per ina combra per el. Elisa accepta quei e sesenta bein. El vuless denton era semussar engrazieivles a quella dunna, mo ei para ch’ella posseda gia tut quei ch’ins sa giavischar. Gehasi, il fumegl dil profet, vegn en agid a siu patrun. El ha constatau che la dunna ei senza affons. Ed Elisa senta il desideri dalla dunna e profetisescha in fegl ad ella.
Ha buca mintga carstgaun enzanua in desideri zuppau. Forsa schizun in mal zuppau? Tgei regal d’astgar entupar carstgauns sco Elisa, carstgauns cun sentiment, carstgauns che vesan el cor dil concarstgaun!
2 Re 4,8–11.14–16
In di eis ei capitau che Elisa ei ius vi a Sunem. Leu habitava ina dunna reha ch’ha sfurzau el da magliar tier ella. Ed aschi savens ch’el mava sperasvi, entrava el en casa e magliava tier ella. Cheu di ella inaga a siu um: Mira, jeu hai entgiert che quei ei in um sogn da Diu che vegn adina sperasvi tier nus. Nus lein schar baghegiar sil plaun sura ina combretta da mir e tschentar leu per el in letg, ina meisa, ina sutga ed ina cazzola. Cu el vegn lu tier nus, sa el prender albiert en quella. In di eis ei lu capitau ch’el ei puspei vegnius sperasvi. Cheu eis el entraus ella combra ed ei semess a durmir leu. Ed el di: Tgei savess ins bein far per ella? GehasiGehasi ei il fumegl dil profet Elisa replica: Daveras, ella ha gie negin fegl, e siu mariu ei gia vegls. Cheu di el: Cloma ella! Ed el cloma ella, ed ella passa sin porta. Ussa di el: En in onn da quest temps vegns ti a carsinar in fegl.
