dad Andri Casanova
Il text ord la tiarza part dil cudisch Jesaja ha ina tempra da resvegl e forsa schizun d’ina certa euforia: Il salit e la giustia ein cheu, els semanifesteschan vida quels che suondan il Segner. Il text cuntegn elements ch’ein enconuschents a nus neu dils diesch condaments: survir ed amar il num dil Segner, observar il sabat eav.
In punct central ei denton ch’era ils jasters ein plidentai ed envidai cheu da Diu. Dieus arva la bratscha per tut ils pievels, quei che munta per nus da s’orientar vid ina tenuta sco ella ei menziunada enamiez il Pentateuc: «Igl jester che viva denter vus duei valer sco indigen. Ti dueis carezar el sco tetez, pertgei era vus fuvas jasters en la tiara d’Egipta. Jeu sun il Segner, vies Diu» (Lev 19,34).
Jes 56,1.6–8
Aschia plaida il Segner:
Observei il dretg, pratichei la giustia,
pertgei miu salit stat per vegnir,
e mia giustia vul serevelar.
Ils jasters che han vuliu setener vid il Segner
per survir ad el ed amar siu num,
che han vuliu daventar ses survients,
che observan il sabat senza profanar el,
che sedrezzan tenor mia ligia;
els vi jeu menar siado sil cuolm da mia sontgezia.
Jeu vi far selegrar els en mia casa d’oraziun.
Lur unfrendas e lur sacrifecis
dueien esser d’engrau sin miu altar.
Pertgei mia casa ei ina casa d’oraziun,
aschia duei ella vegnir numnada tier tut ils pievels.
Quei ei la sentenzia dil Segner Jahve Il num dil Segner vegn tenor tradiziun giudaica buca legius.
che vegn a rimnar ils starschai d’Israel:
Aunc auters vi jeu rimnar
tier quels che ein gia rimnai ad el.
