da sur Martin Bearth
Cun il tun da posauna alarmavan ils guardians dil marcau il pievel, sche prighels d’ordeifer smanatschavan.
Era il profet Ezechiel ei in «guardian». El ha retschiert da Diu las ordras d’alarmar il pievel, da far attents quel sin la consequenzas prigulusas che smanatschan pervia da lur sedepurtar zanistrau. Suonda il pievel buca il clom dil profet, vegn Dieus a pretender dil pievel plaid e fatg, rendaquen. Il guardian denton ei satisfatgs. El ei responsabels enviers Diu, el ha da suandar Diu. Autruisa daventa el in traditur.
Cons guardians, cons profets, han unfriu lur veta per lur missiun! Era Jesus. – Anfla igl alarm dil «guardian» adina ureglia e cor aviert tier il pievel?
Ez 33,7–9
Aschia plaida il Segner:
Fegl dil carstgaun, tei dun jeu per guardian alla casa d’Israel. Sche ti audas in plaid da mia bucca, lu stos ti admonir els en miu stagl. Sche jeu ditg ad in malfatschent: Ti eis dalla mort! – e ti plaidas buc per admonir il malfatschent da bandunar sia via, lu vegn quei malfatschent a murir pervia da siu malfatg. Mo ti stos dar quen a mi per siu saung. Sche ti admoneschas denton il malfatschent da bandunar sia via e seconverter, ed el seconverta buc, lu sto el murir pervia da siu malfatg; mo ti has spindrau tia veta.
