dad Andri Casanova
Ella davosa part dalla brev da Paulus als fideivels a Corint numna el duas caussas ord sia veta: las revelaziuns ch’el ha retschiert ed in uegl ella carn. El emprova numnadamein d’avertir ils da Corint da star silla dretga via. Leu deva ei da lezs temps differents missiunaris che segloriavan probabel pli fetg dall’atgna forza che da Cristus.
Pia, Paulus accentuescha ch’el tschontscha buc semplamein ord sesez, mobein ch’el ha giu profund inscunters mistics cun Cristus. Quei ha intimau el per sia missiun nunstunclenteivla. Quei anim ei aschi gronds che gnanc ina malsogna cronica ch’el para da ver giu – pia quei schinumnau uegl ella carn – vess pudiu frenar el. Anzi, entras Cristus ha el survegniu l’enconuschientscha che tala malsogna e las fleivlezias pon esser muments da fermezia, ina fermezia en Cristus.
2 Cor 12,7–10
Mes cars! Per che jeu daventi buca supiervis muort la surabundonza da revelaziuns, ei vegniu dau a mi in uegl ella carn, in aunghel-satan che duei dar fridas a mi, sinaquei che jeu vegni buca loschs. Treis ga hai jeu supplicau il Segner, che quei satan tschessi da mei. Mo el ha declarau a mi: Mia grazia basta per tei, pertgei mia pussonza semuossa ual ella fleivlezia.
Perquei vi jeu da tut cor segloriar tonpli da mias fleivlezias, sinaquei che la forza da Cristus prendi avdonza en mei.
Per quella raschun hai jeu plascher dad esser en fleivlezias, en insultas, en miserias, en persecuziuns ed anguoschas per amur da Cristus; pertgei cu jeu sun fleivels, ual lu sun jeu ferms.
