da sur Marcus Flury
Cun quei ch’ei scret el vargau per nossa instrucziun manegia sogn Paul las scartiras dil Veder Testament. El numna Diu «il Diu dalla pazienzia e dil confiert». Quel entaup’el ella Bibla e quel duei gidar la cuminonza ad unitad. Pazienzia e confiert ein en quella lecziun plaids da clav che san menar ad unitad. En mintga cuminonza dat ei diversitads. Mo quei che unescha tuts duei esser pli ferm che quei che separa. «Acceptei in l’auter, sco era Cristus ha acceptau vus per gloria da Diu.» En quella construcziun ei resumau tgei ch’ei munta da viver sco cristians ord la cardientscha. Nus dein honur a Diu entras quei ch’era nus acceptein in l’auter.
Ro 15,4–9
Mes cars! Tut quei ch’ei vegniu scret el vargau, ei scret per nossa instrucziun, sinaquei che nus veien la speronza tras la perseveronza e la consolaziun che las Scartiras dattan.
Il Diu dalla pazienzia e dil confiert concedi a vus d’esser dil medem meini denter vus tenor igl exempel da Cristus Jesus, sinaquei che vus, sco ord ina bucca, glorificheies unanimamein Diu, il
Bab da Niessegner Jesus Cristus.
Perquei acceptei in l’auter, sco era Cristus ha acceptau vus per gloria da Diu.
Jeu less dir: Cristus ei daventaus il survient dalla surtagliada per amur dalla verdeivladad da Diu, per ademplir las empermischuns fatgas als perdavons. Ed ils pagauns san glorificar Diu muort
sia misericordia, sco ei stat scret:
Perquei vi jeu ludar tei denter ils pievels e cantar laud a tiu num.
