da Maria Cristina Derungs-Bartolomei
La cuminonza de Corint fuva fetg viva, reha de duns carismatics (mira capetels 12 tochen 14 della medema brev); cul temps denton era igl entusiassem secumbinaus cun malperinadads, discordias, ed era deviaziuns moralas, objects de fermas reprimandas da vart de sogn Paul.
Ils fideivels de Corint eran per gronda part glieud sempla. Sogn Paul fa endamen ad els che lur vocaziun ei in dun gratuit da vart de Diu. De quel astg’ins perquei buca daventar loschs, sco sch’ei fuss in meret. Avon Diu ha negin tetels de meret: Buc ils sabis, buc ils nobels, era buc ils sempels.
Tras grazia de Diu ein ils cartents ussa «en Cristus», quei vul dir ein part viventa de siu tgierp vivent. En Cristus han els retschiert il salit; en e tras Cristus ein els vegni giustificai dalla cundiziun de pucconts; ein vegni sanctificai; per els ha Dieus sez pagau en Jesus Christus il prezi pil spindrament, per ch’els seigien buca pli sclavs, mobein libers affons de Diu. Igl apiestel citescha ils versets 22–23 ord il capetel 9 de Jeremias: Tgi che vul segloriar, selaudi ch’el hagi enconuschiu e capiu ch’il Segner sulet ei quel che fa grazia.
1 Cor 1,26–31
Mes cars, considerei vossa vocaziun! Cheu ein buca bia sabis tenor giudicar human, buca bia pussents, buca bia nobels. Anzi, quei ch’ei ortgadad els egls dil mund ha Dieus eligiu per far
seturpegiar ils sabis; e quei ch’ei fleivlezia els egls dil mund ha Dieus eligiu per far seturpegiar quei ch’ei ferm.
Pilver, quei ch’ei pil mund senza noblezia e sbittau, quei ch’ei nuot, ha Dieus eligiu per annullar quei ch’ei enzatgei, sinaquei che nuot carnal sappi segloriar avon Diu.
Dad el deriv’ei che vus essas en Cristus Jesus, il qual ei daventaus per nus sabientscha che vegn da Diu e spindrament.
Aschia vali quei che stat scret: Tgi che vul segloriar, seglorieschi enten il Segner!
☛ 1. lecziun dalla dumengia: Zef 2,3; 3,12–13
☛ evangeli dalla dumengia: Mt 5,1–12a
