da Maria Cristina Derungs-Bartolomei
Era sch’ils fideivels de Corint s’udevan buca tier la gruppa dils sabis ed experts en studis, eran els tuttina de cultura greca e sentavan la fascinaziun, la noblezia della savida, oravontut filosofica. Sogn Paul fa in ferm streh tras eventualas ambiziuns de vegnir tier sabientscha humana, de entrar en in cerchel distinguiu tras l’annunzia della cardientscha.
Igl Evangeli che dat il salit ei quel dil Crucifigau ed ha de far nuot cun grondezia humana e merets humans.
Igl apiestel sez sepresenta sco in fleivel e munglus mied tras il qual il spért e la forza de Diu sulet vegnan manifestai e annunziai.
Mo sin Diu e buca sin ses annunziaders, ni sils duns humans de sabientscha sto la cardientscha sebasar per haver in ferm fundament.
1 Cor 2,1–5
Cu jeu sun vegnius tier vus, mes cars, sun jeu buca vegnius ad annunziar la perdetga da Diu cun grondiusa eloquenza e sabientscha.
Jeu vevel numnadamein fatg il propiest d’enconuscher denter vus nuot auter che Jesus Cristus, e quei il crucifigau.
E dil reminent sun jeu vegnius tier vus en fleivlezia, cun tema e gronda trembletga. Miu plaid e miu priedi ein buca stai perschuadents discuors da sabientscha, mobein ina manifestaziun da spért
e da forza, sinaquei che vossa cardientscha sebasi buca sin sabientscha da carstgauns, mo seigi francada ella forza da Diu.
