1 Pd 1,3–9
Benedius seigi Dieus, il Bab da Niessegner Jesus Cristus! En sia gronda misericordia ha el fatg renescher nus, per che nus veien tras la levada da Jesus Cristus ina viva speronza e retscheveien
la ierta nuncorrumpeivla, nunmaculada e nunvargheivla ch’ei reservada per vus en tschiel.
Pertgei la pussonza da Diu pertgira vus tras la cardientscha, per che vus contonscheies il salit ch’ei promts da vegnir revelaus il davos temps.
Da quei vegnis vus a selegrar, malgrad che vus vegnis forsa tribulai per in cuort temps da differentas tentaziuns. Cheutras duei la valeta da vossa cardientscha semussar pli custeivla ch’igl aur
che vegn cumprovaus tras il fiug ed ei tonaton vargheivels.
Aschia vegn vossa cardientscha ad esser in motiv da laud, gloria ed honur tier la vegnida da Jesus Cristus.
Quel carezeis vus senza ver viu el; enten el carteis vus senza veser el gia ussa, e vus giubileis en ina legria nundetga e gloriusa, pertgei vus vegnis a contonscher la finamira da vossa
cardientscha: Il salit dallas olmas.
