da sora Armina Maissen
Atgnamein duvrass quella lecziun buca commentari. Ella plaida sezza.
Tuttina zacons patratgs:
La speronza sebasa sin il fundament da nossa cardientscha. Mo cardientscha senza fidonza, fuss memia pauc. La fidonza en Diu nutrescha la speronza e lai sclarir ella en nies sedepurtar visavi il concarstgaun. Quella glisch da fidonza «plaida» senza plaids e sveglia el visavi baul ni tard damondas, che pon sminuir in tec la forza da calumnias ch’ein forsa avon maun tier quel ni tschel.
Ei nossa cardientscha cumpignada da quella fidonza, dat ella forza a nus da pitir era enten far dil bien. Ella meina nossa egliada e nies patertgar sin la veta da Jesus Cristus, che ei vivius en cumpleina fidonza en siu Bab en tschiel ed ha survegniu da leu la forza da pitir per nus malgests schi sgarscheivlamein vid la crusch. E sco el ei tenor il spért vegnius vivificaus, vivifichescha el era nus entras il dun dil sogn Spert.
1 Pd 3,15–18
Mes cars! Teni il Segner Jesus sogns en vos cors e seigies adina promts da dar plaid e fatg a scadin che vul saver il motiv dalla speronza ch’ei enten vus. Mo rispundei cun humilitonza e respect,
pertgei vus veis ina buna cunscienzia.
Aschia ston quels che dattan la bucca da vies bien sedepurtar en Cristus, seturpegiar ual en quels graus ch’els han calumniau vus.
Pertgei igl ei meglier – sche la voluntad da Diu pretenda quei – da pitir cun far dil bien che cun far dil mal.
Pertgei era Cristus ei morts ina suletta gada pervia dils puccaus, il gest per ils malgests, per menar vus tier Diu; tenor la carn eis el vegnius mazzaus, tenor il spért denton vivificaus.
☛ 1. lecziun dalla dumengia: Fatgs 8,5–8.14–17
☛ evangeli dalla dumengia: Gn 14,15–21
