2. […]
La Baselgia catolica refusa nuot da quei ch’ei ver e sogn en questas religiuns [v.d. igl hinduissem, budissem ed autras religiuns]. Ella considerescha cun respect sincer lur manieras dad agir e
viver, lur prescripziuns e ductrinas, che secuntrasteschan savens cun quei ch’ella sezza crei e perdeghescha. Mo gnanc darar reflecteschan quellas in radi da quella Verdad ch’illuminescha tut ils
carstgauns. La Baselgia denton annunzia, gie ei obligada dad annunziar senza cal Cristus ch’ei la via, la verdad e la veta (Gn 14,6). En el dueien ils carstgauns anflar la plenezia dalla veta
religiusa ed en el ha Dieus reconciliau tut cun sesez (cf. 2 Cor 5,18s).
Perquei admonescha ella ses fegls e sias feglias, ch’els veglien cun prudientscha e carezia, entras il discuors e la collaboraziun culs adherents dallas autras religiuns ed enten dar perdetga
dalla cardientscha e veta cristiana, renconuscher, salvar e promover ils beins spirituals e morals e las valurs socioculturalas ch’ein da cattar tier quels.
3. […]
Cunquei che gnanc paucas malperinadads e disamicezias ein seformadas el decuors dils tschentaners denter Cristians e Musulmans, encuraschescha la sontga sinoda tuts dad emblidar il vargau, da
s’engaschar sinceramein per ina capientscha vicendeivla e da proteger e promover da cuminonza la giustia sociala, ils beins morals ed era la pasch e libertad per tut ils carstgauns.
4. […]
Essend pia il relasch spiritual communabel da Cristians e Gedius talmein gronds, vul la sontga sinoda promover e recumandar l’enconuschientscha e stema vicendeivla ch’ins obtegn oravontut entras
il studi biblic e teologic ed entras in dialog fratern.
[…]
5. Nus savein buc invocar Diu sco Bab da tuts carstgauns, sche nus refusein a certins ch’ein era scaffi tenor la semeglia da Diu, da renconuscher els sco nos fargliuns. La tenuta dil carstgaun
enviers Diu il Bab e la tenuta dil carstgaun enviers ils auters carstgauns ch’ein ses fargliuns, ein colligiadas talmein che la Scartira di: «Tgi che careza buc, ha buc enconuschiu Diu» (1 Gn
4,8).
[…]
Consequentamein condemnescha la Baselgia scadina discriminaziun da carstgauns ni acts da violenza per raschun dalla razza ni dalla colur, dil stan social ni dalla religiun, pertgei tal
cumpurtament ei cuntraris al spért da Cristus. […]
