· 

Fiasta da pastgas (B)

da Flurina Cavegn-Tomaschett

Igl evangeli da nossa pli gronda fiasta da cardientscha, la fiasta da Pastgas, entscheiva cun l’iniziativa dad ina dunna. Quei ei nunusitau! Igl ei Maria Madleina che va, malgrad ch’igl ei aunc tut stgir en ed entuorn ella, sin fossa da Jesus. Aunc ina davosa ga esser cun el, contemplar siu tgierp maltractau, seregurdar dil temps communabel. E forsa anflar ina ni l’autra risposta. Denton – enstagl da rispostas anfla ella ina fossa vita.

La fossa vita sto bein esser stau in schoc per la dunna. Jeu savess capir, sch’ella fuss stada bloccada e paralisada da quei schabetg. Denton il cuntrari: Maria Madleina semetta en moviment – e lu aunc co: ella cuora per parter si’experientscha culs giuvnals. E lezs selain tschaffar da quei moviment e cuoran anavos per sezs daventar perdetgas dalla fossa vita. Igl ei schizun da sentir ina certa concurrenza denter ils dus giuvnals. Tgeinin ei il pli spert?

Schibein Maria Madleina sco Pieder ed il giuvnal che Jesus carezava daventan perdetgas dalla fossa vita. La descripziun digl evangelist Gion lai negin dubi a quei fatg: il crap ruclau naven dall’entrada, ils lenzeuls giun plaun, il sudari cavegliaus dasperas. Clars indezis, ch’igl ei schabegiau enzatgei extraordinari; enzatgei ch’ei buca da capir cun il tgau, mobein mo cun il cor.

Gn 20,1–9

1Igl emprem di dalla jamna ei Maria Madleina vegnida la damaun ch’ei fuva aunc stgir sin fossa ed ha viu ch’il crap era dustaus dalla fossa. 2Cheu eis ella currida e vegnida tier Simon Pieder e l’auter giuvnal, quel che Jesus carezava, ed ha detg ad els: Ei han priu il Segner ord fossa, e nus savein buca, nua ch’ei han mess el. 3Sinquei ein Pieder e l’auter giuvnal i giuado ed ein arrivai alla fossa. 4Domisdus currevan ensemen, mo l’auter giuvnal ei currius ordavon a Pieder ed arrivaus igl emprem alla fossa. 5El ei staus giudavon ed ha viu ils lenzeuls giun plaun mo ei buc ius viaden. 6Uss ei era Simon Pieder che suandava el arrivaus ed entraus ella fossa. El ha viu ils lenzeuls giun plaun 7ed il sudari, cul qual il tgau da Jesus era staus cuvretgs; quel fuva denton buca sper ils lenzeuls, mobein zugliaus ensemen en in liug dapersei. 8Uss ei era l’auter giuvnal che fuva vegnius igl emprem alla fossa ius viaden; el ha viu e cartiu. 9En verdad vevan els aunc buca capiu ch’el stoppi, tenor la Scartira, levar da mort en veta.

Download
Versiun per stampar
Pastgas 1 B.pdf
Adobe Acrobat Dokument 84.0 KB