da Flurina Cavegn-Tomaschett
Il sequent evangeli raquenta co Jesus ha eligiu ord il miez da ses giuvnals dudisch umens e co el ha tarmess els denter il pievel per cuntinuar cun l’ovra ch’el sez veva gia entschiet. L’incumbensa dils giuvnals vegn buca descreta el detagl, perencunter declara igl evangelist Marc enqual particularitad davart la moda e maniera digl esser sin viadi. Ils giuvnals duein buc ir persuls, mobein pèr a pèr. Els duein prender cun els nuot auter ch’in fest, il vestgiu e las sandalas. Lur veta duei pia buc esser ligiada vid possess materialistic, mobein vid relaziuns denter carstgauns.
Las relaziuns humanas stattan era el center da lur missiun: els duein buca annunziar, battegiar e baghegiar baselgias, mobein medegar ils carstgauns da lur malsognas internas ed externas. Els ein tarmess per midar il mund, e quei sulet cun lur plaids, ovras ed exempel.
Quella missiun vegn buc ad anflar mo ureglias attentas e cors aviarts. Lezza experientscha veva era Jesus fatg e perquei dat el ordras, co secuntener en tals cass. Ils giuvnals duein scurlar la puorla da lur calzers. Quei munta ton sco: «Scurlei giu da vusezs tut il negativ che tals inscunters han schau anavos. E lu cuntinuei il viadi!»
Mc 6,7–13
7Lu ha el clamau neutier ils dudisch e tarmess els dus a dus, dond ad els pussonza sur dils spérts malmunds. 8Ed el ha dau il camond ad els da prender nuot sin via dano in fest; ni paun, ni tastga, ni daners ella tschenta, 9denton: Targei en sandalas e buca prendei dus vestgius! 10Plinavon ha el detg ad els: Nua che vus entreis en ina casa, restei tochen che vus meis pli lunsch. 11E sch’in liug vul buc acceptar vus, e la glieud vul buca tedlar vus, bandunei quei liug e scurlei la puorla giud vos peis per perdetga encunter els. 12Els ein i ed han perdegau, ch’ins dueigi seconverter; 13ed els han scatschau bia demunis ed unschiu bia malsauns cun ieli e medegau els.
