dad Andri Casanova-Baumgartner
Tgi ei Jesus? Quella damonda crei Pieder da saver rispunder cun in sulet plaid: Cristus. E nus pudein ir d’accord. Jesus ei il Cristus, v.d. il Messias. Pieder para da saver tgi che Jesus ei. Mo el survegn paucas lingias pli tard in lavatgau, perquei ch’el para da ver capiu schuber lidinuot.
Jesus annunzia buca senza raschun sia passiun, mort e levada. Quei fa numnadamein part dalla risposta sin sia atgna damonda. Quella part ha Pieder denton aunc buca capiu. Jesus ei buca semplamein in che fa miraclas. Anzi, el metta en moviment enzatgei cun sia veta e cun sia mort.
Tgi ei pia Jesus? – Quella damonda savein era nus buca rispunder cun in plaid. Nossa risposta duein nus dar cun nies agir e cun nossa veta.
Mc 8,27–35
27Jesus ei serendius cun ses giuvnals els vitgs che audan tier Cesarea Filippi. Sin via ha el tschentau a ses giuvnals la damonda: Tgi di la glieud che jeu seigi? 28Els han rispundiu: Gion Battesta! Per auters eis ti Elia e per auters in dils profets. – 29Mo per vus, ha el dumandau els, tgi sun jeu per vus? Cheu ha Pieder priu il plaid e detg: Ti eis il Cristus! 30Lu ha el dau ad els il rigurus camond da plidar cun negin dad el.
31Ed el ha entschiet ad instruir els ch’il Fegl dil carstgaun hagi da pitir bia, ch’el vegni sbittaus dils vegls, dils premsacerdots e mussaders dalla lescha, ch’el vegni mazzaus, mo vegni a levar suenter treis dis da mort en veta. 32Quei tut scheva el aviartamein. Sinquei ha Pieder priu el d’ina vart e fatg reproschas ad el. 33Mo el ei seviults, ha mirau sin ses giuvnals e dau ina reprimanda a Pieder schend: Naven da mei, satan! Pertgei tes patratgs ein buca patratgs da Diu, mobein da carstgauns.
34Ed el ha clamau neutier il pievel ensemen cun ses giuvnals ed ha detg ad els: Sch’enzatgi vul esser miu giuvnal, sto el snegar sesez, prender sia crusch e suandar mei. 35Pertgei tgi che less salvar sia veta, lez piarda ella. Mo tgi ch’ei promts da piarder sia veta per amur da mei e digl evangeli, lez salva ella.
