dad Ursicin G. G. Derungs-Bartolomei
Gion, in dils apostels, less scumandar a quels «ch’ein buca dils nos» (v. 38) da far en num de Jesus zatgei dil bien ni cumbatter il mal («scatschar demunis»). Mo Jesus di: ins sto buc esser «dils nos» per scatschar demunis. Jesus ei pli gronds ch’il «nus» ecclesiastic.
La secunda part de quei evangeli plaida dil dar scandel, e quei en tun intransigent, senza cumpromiss, fagend diever dils mieds pli extrems della retorica, la hiperbla tochen all’absurditad: Tagliar giu in maun, scarpar o in egl. Mo Jesus vul dir: Il scandel ei leu, nua che zatgi patratga che tut seigi tuttina, ch’ei emporti atgnamein nuot tgei ch’ins fetschi. Jesus para da dir: Ei dat caussas cun las qualas vus destruis auters e vusezs. Quella «destrucziun de sesez» e dils auters ei il scandel, ei igl «uffiern», maletg prius da Jesaja 66,24.
E lu, il dar scandel als pigns. Cheu patratg’ins cun raschun alla pedofilia. Aber igl ei zatgei dapli: è igl exempel della societad ei scandalus, cu ella muossa als affons, als «pigns», ch’il sulet impurtont seigi da vegnir suren als auters. E che «tut seigi pigl auter tuttina». Cu ella, la societad, ignorescha ils affons, lur basegns d’attenziun, carezia ed instrucziun.
Mc 9,38–43.45.47–48
38Gion ha detg ad el: Mussader, nus vein viu in che scatschava demunis en tiu num, mo che suonda buca nus; e nus vein vuliu impedir el, perquei ch’el suandava buca nus. 39Mo Jesus ha detg: Buc impedi el, pertgei negin che fa ina miracla en miu num vegn aschi spert a saver plidar dil mal da mei. 40Tgi ch’ei buca encunter nus ei per nus.
41Scadin che dat a vus in cup aua da beiber, perquei che vus essas da Cristus, en verdad, jeu ditgel a vus: A quel vegn ins buc a snegar sia pagaglia.
42Mo tgi che dat scandel ad in da quels pigns che creian, per lez fuss ei meglier, sch’ins pendess ad el ina mola-mulin entuorn culiez, ed el vegness fiers ella mar. 43E sche tiu maun ei ina caschun da puccau per tei, taglia giu el! Igl ei meglier per tei d’entrar mendus ella veta che da ver dus mauns e vegnir fiers egl uffiern, el fiug che stezza mai. 45E sche tiu pei ei ina caschun da puccau per tei, taglia giu el! Igl ei meglier per tei d’entrar zops ella veta che da ver dus peis e vegnir fiers egl uffiern. 47E sche tiu egl ei ina caschun da puccau per tei, cava ora el! Igl ei meglier per tei d’entrar cun in egl el reginavel da Diu che da ver dus egls e vegnir fiers egl uffiern, 48nua che lur vierm maina miera ed il fiug maina stezza.
