da Flurina Cavegn-Tomaschett
Il suandont evangeli raquenta dad ina discussiun denter Jesus ed in mussader dalla lescha. Igl ei in da plirs discuors, nua che gruppaziuns dil giudaissem confruntan Jesus cun damondas che vulan metter el sin l’emprova. Quella discussiun sedifferenziescha empau dallas autras, pertgei ella sespleiga en in tun harmonic. Ni il mussader dalla lescha ni Jesus van sin confruntaziun.
Sin la damonda, tgeinin che seigi il pli impurtont muossavia, dat Jesus ina risposta che cumpeglia dus avis: Carezar Diu e carezar il proxim. Quels dus camondaments paran dad esser il fundament e l’encorunaziun per tut ils auters. Il carezar il proxim sco sesez vala sco regla d’aur che ha anflau access en autras religiuns e vala sco basa per tutta convivenza. Quella carezia proximala praticheschan era ils dus disputaders egl evangeli, pertgei els s’entaupan cun respect e procuran per harmonia.
Mc 12,28b–34
28bIn mussader dalla lescha […] ha dumandau el: Tgeinin ei igl emprem da tut ils camondaments? 29Jesus ha rispundiu: Igl emprem ei quel: Teidla, Israel, il Segner nies Diu ei il sulet Signur, 30e ti dueis carezar il Segner tiu Diu da tut tiu cor, da tut ti’olma, da tut tiu spért e da tut tia forza. 31Ed il secund ei: Ti dueis carezar tiu proxim sco tetez. Pli gronds camondaments che quels dat ei buc. 32Cheu ha il mussader dalla lescha detg ad el: Fetg bien, Mussader! Ti has giu raschun da dir ch’ei dat in sulet Diu e ch’ei dat buc in auter ch’el persuls. 33E carezar el da tut siu cor, da tut siu intelletg e da tut sia forza, e carezar il proxim sco sesez, vala dapli che tuttas unfrendas e tuts sacrifecis. 34Vesend Jesus, ch’el veva dau ina sabia risposta, ha el detg ad el: Ti eis buca lunsch naven dil reginavel da Diu. E negin che ha ughegiau pli da far damondas ad el.
