da Marcel Köhle
Igl evangeli da questa dumengia tematisescha la fin dil mund cun maletgs stermentus. Era sche nus savein che las steilas crodan buca semplamein aschia giu da tschiel, fa quei text tuttina endamen che tut vegn inaga ad haver ina fin, era nossa veta humana.
A quei maletg da finitadad vegn in auter cunterponius: il maletg dil «Fegl dil carstgaun» che vegn en nies mund finit e porta cheu salvament als carstgauns.
Malgrad tut ils maletgs apocaliptics eis ei in evangeli da speronza: en tut il stgir da nies mund cun sias temas, malsegirtads e catastrofas, ha Dieus dau a nus ina glisch da speronza ch’ei vegnida veseivla en Jesus Cristus. Tenor igl evangelist eis el il garant che tut anfla in buna finiziun.
Mc 13,24–32
24Mo lezs dis, suenter quella tribulaziun, vegn il sulegl a sestgirentar, la glina vegn a piarder siu clar, 25las steilas vegnan a curdar giu da tschiel, e las forzas dil tschiel vegnan zaccudidas. 26E lu vegn ins a veser il Fegl dil carstgaun a vegnend sin las neblas cun gronda pussonza e maiestad. 27E lu vegn el a tarmetter ils aunghels e rimnar ses eligi dallas quater varts dil mund, dil cunfin dalla tiara al cunfin dil tschiel.
28Dil figher emprendei la semeglia: Cura che sia roma ha schit e sia feglia catscha, saveis vus che la stad ei damaneivel. 29Aschia era vus: Cura che vus veseis quei, saveis vus ch’El ei damaneivel, gest avon porta. 30En verdad, jeu ditgel a vus: Questa generaziun vegn buc a svanir, avon che tut quei daventi. 31Tschiel e tiara vegnan a svanir, mo mes plaids vegnan buc a svanir.
32Gliez di ni lezz’ura negin ch’enconuscha, ni ils aunghels dil tschiel, ni il Fegl, sulettamein il Bab.
