· 

3. dumengia d’advent (C)

da Marcel Köhle

La tiarza dumengia d’advent stat la persuna da Gion Battesta el center digl evangeli. Sco precursur da Niessegner ha el perdegau la conversiun e la vegnida dil Salvader.

Egl evangeli dad oz sent’ins che la glieud che vegn tier el, ei promta da vuler seconverter e da bandunar lur vias fallidas. Mo co far quei? Treis ga vegn Gion Battesta dumandaus tgei ch’els dueien far concretamein. Ed el rispunda sin quellas damondas: Seigies misericordeivels, gests e cuntents.

Ella risposta da Gion Battesta vesel jeu era ozildi in impuls. Daco buc inaga sedumandar: Co sai jeu esser empau pli misericordeivels? Enviers tgi stuess jeu esser pli gests? Sun jeu cuntents cun quei che jeu hai ni less jeu adina aunc dapli? – Quellas damondas san forsa gidar da veser (puspei) quei che ei propi impurtont en nossa veta. E tgisà, forsa gidan ellas era da veser igl essenzial dalla fiasta da Nadal: Quel che porta propi al mund misericordia, gestadad, pasch e cuntentientscha.

Lc 3,10–18

10Cheu dumandavan las roschas: Tgei duein nus pia far? 11Ed el rispundeva: Tgi che ha dus vestgius duei dar in a quel che ha nuot, e tgi che ha da magliar duei far il medem. 12Era publicans vegnevan per seschar battegiar e schevan ad el: Mussader, tgei duein nus far? 13El rispundeva ad els: Buc incassei dapli che quei ch’ei fixau. 14Era schuldada dumandava e scheva: E nus, tgei duein nus far? Ed el rispundeva: Sblundergei negin, squitschei ora daners da negin e seigies cuntents cun vossa paga.

15Ferton ch’il pievel fuva spanegiaus, e tuts fagevan patratgs, sche Gion savessi buca forsa esser il Messias, 16ha Gion dau ad els tuts la risposta: Jeu battegel vus cun aua. Mo quel ch’ei pli pussents che jeu vegn a vegnir. Jeu sun buca vengonzs da snuar las curegias da ses calzers. El vegn a battegiar vus el Spert sogn ed el fiug. 17El tegn gia enta maun la pala per schubergiar siu iral da rudien e rimnar la salin en siu garner. La paglia denton vegn el a barschar el fiug che stezza mai.

Download
Versiun per stampar
Advent 3 C.pdf
Adobe Acrobat Dokument 83.4 KB