dad Ursicin G. G. Derungs-Bartolomei
La quarta dumengia d’advent porta il segn de duas grondas dunnas, omisduas en speronza, che s’embratschan. Igl ei sco sch’ils dus Testaments, il Vegl ed il Niev s’entupassen sigilond la cumplenida d’ina empermischun dada dapi tschentaners. E siu profet, Gion daventaus il battegiader, il davos ed emprem grond profet, dat is el best della mumma e po buca spetgar da vegnir alla glisch. Quei entir evangeli ei signaus da speronza e da spetga, da legria, beadadad e cardientscha. Pertgei «beada eis ti che has cartiu». Quei segn de speronza, legria e cardientscha vegn da duas dunnas. Buca mo quei: dalla sentupada denter duas dunnas. Ellas ein purtadras dil vargau profetic (Gion, il battegiader) e dil futur de cumplenida el Reginavel de Diu en Jesus.
Agl evangelist Lucas stat quella historia entretschada denter duas grondas dunnas e dus profets a cor. Zaharias, il bab de Gion, ei méts perquei ch’el ha dubitau. Ni sco sogn Augustin di: il sacerdot sto quescher, cu il profet nescha. E cu el ei naschius, sesligia è la lieunga de Zaharias en il grondius benedictus – pér suenter che Maria ha cantau siu magnificat.
Lc 1,39–45
39Lezs dis ei Maria semessa sin via ed ida cun prescha viers la muntogna en in marcau dalla Giudea. 40Ella ei entrada en casa da Zaharias ed ha salidau Elisabet. 41Cura che Elisabet ha udiu il salid da Maria, ei igl affon en siu best semuentaus. Ed Elisabet ei vegnida emplenida dil Spert sogn 42ed ha exclamau cun aulta vusch: Benedida eis ti denter las dunnauns e benedius ei il fretg da tiu best! 43Daco vegn ei concediu a mi che la mumma da miu Signur vegn tier mei? 44Pertgei mira, cu tiu salid ha tunau en mias ureglias, ei igl affon en miu best semuentaus da legria.
45Beada quella che ha cartiu che quei ch’ei vegniu detg ad ella dil Segner mondi en vigur.
