· 

Dumengia da palmas

da Maria Cristina Derungs-Bartolomei

Quei Evangeli envida en nus a suandar Jesus che va «vinavon» ed era «ordavon a tuts» (igl original grec ha omisduas muntadas) viers Jerusalem. Buca per entrar en el sco triumfader: El bragia mirond sil marcau, nua ch’el vegn a vegnir truaus alla mort. Mo, sco ils giuvnals che contan laud a Diu, savein nus renconuscher en Jesus il Messias migeivel e humiliteivels, che ademplescha las profezias e realisescha l’annunzia da Nadal «gloria en tschiel e pasch sin tiara», variada cheu en «Pasch en tschiel e gloria ell’altezia»: La pasch per Jesus ei buca sin quest mund, mobein ella levada.

Il text porscha bia indezis per encuraschar a sefidar de Jesus. Sco el capetel 22 (cura ch’igl ei d’anflar ina sala per la tscheina pascala), tarmetta el ses discipels cun indicaziuns curiosas ed era ughiadas: «vus vegnis ad anflar in pulein…». Mo «sin siu plaid» van els ed anflan «sco il Segner veva detg». Quei di a nus che il maun de Diu sezuppa els schabetgs de nossa veta. Nus astgein sefidar: Negin era aunc sesius sin quei pulein. Quei vul dir: ei vegn encunter a nus enzatgei maisudiu, dil tut niev ella historia humana, enzatgi misterius ch’ei nies Retg, Signur, Salvader.

Lc 19,28–40

28Suenter quels plaids eis el ius vinavon viers Jerusalem. 29S’avischinond a Betfage e Betania, damaneivel dil schinumnau Cuolm dallas ulivas, ha el tarmess ordavon dus da ses giuvnals e detg: 30Mei el vitg davon vus. Entrond leu, anfleis vus in pulein ch’ei rentaus. Sin quel ei aunc negin sesius. Disrentei el e vegni cun el. 31E sch’enzatgi empiara vus: Pertgei disrenteis el? sche schei: Il Segner drova el. 32Ils tarmess ein i ed han anflau tut sco el veva detg ad els. 33Cura ch’els disrentavan il pulein, han ses patruns dumandau: Pertgei disrenteis il pulein? 34Els han rispundiu: Il Segner drova el.

35Ed ei han menau il pulein tier Jesus, han tschentau sin el lur mantials e fatg seser Jesus sissu. 36Entschevend el ad ir, han ei rasau lur vestgadira sin via avon el. 37Arrivaus damaneivel dil liug, nua ch’ins descenda dil Cuolm dallas ulivas, ha l’entira roscha dils giuvnals entschiet plein legria a ludar Diu cun aulta vusch per tut las miraclas ch’els vevan viu. 38EIs han clamau:

Benedius il retg

che vegn el num dil Segner!

Pasch en tschiel e gloria ell’altezia!

39Enzacons farisès ordenter la fuola han detg ad el: Mussader, scamonda quei a tes giuvnals! 40Mo el ha rispundiu: Jeu ditgel a vus: Sch’els queschan, vegn la crappa a grir.

Download
Versiun per stampar
Cureisma Palmas C.pdf
Adobe Acrobat Dokument 93.3 KB