da Flurina Cavegn-Tomaschett
Cun ils versets da questa dumengia entscheiva la via da Jesus naven da Galilea viers Jerusalem. Igl evangelist Lucas descriva liung e lad quei viadi, exactamein enteifer 10 capetels. La via meina tras la regiun da Samaria. Denter ils Samaritans ed ils Gedius regevan tensiuns religiusas e culturalas, aschia ch’igl ei buca stau da far curvien, ch’ils Samaritans han refusau la damonda da dar albiert a Jesus ed a sia truppa. Ils viandonts eran gie sin via viers Jerusalem, pia tier in liug sogn che steva en concurrenza cun lur cuolm sogn, il Garizim.
Il raquent dat inaga dapli perdetga, che Jesus era buca persuls sin via. El vegneva accumpignaus da giuvnalas e giuvnals, in cerchel d’accumpignaders che vegnevan pli e pli gronds. Nus legin oz da carstgauns che vulan entrar en quei cerchel e suandar Jesus. Las pretensiuns che Jesus tschenta muossan, ch’il suandar el ei buc in ir a spass. Daventar sia giuvnala ni siu giuvnal pretenda ina tenuta radicala. Esser cun el sin via vul dir metter novas prioritads e piarder segirtads mundanas. Tgi che mira denton anavon e pren il reginavel da Diu en mira, va encunter alla veta nova.
Lc 9,51–62
51Cunquei ch’il temps fuva damaneivel ch’el dueva vegnir alzaus, ha el priu decisivamein la via viers Jerusalem. 52El ha tarmess nunzis ordavon. Quels ein i e vegni en in vitg da Samaritans per preparar albiert per el. 53Mo ins ha buca retschiert el, perquei ch’el era sin via viers Jerusalem. 54Vesend quei, han ils giuvnals Giachen e Gion detg ad el: Segner, vul ti che nus scheien: Fiug crodi giu da tschiel e consumeschi els? 55Mo el ei seviults ed ha sevilau sin els. 56Lu ein els i en in auter vitg.
57Ferton ch’els mavan per via, ha in detg ad el: Jeu vi suandar tei, nua che ti vas. 58Jesus ha rispundiu ad el: Las uolps han taunas, ed ils utschals dil tschiel han ignivs; il Fegl dil carstgaun denton ha nuot per pusar siu tgau.
59Ad in auter ha el detg: Suonda mei! Quel ha detg: Lai ir mei igl emprem a satrar miu bab. 60Mo el ha detg: Lai satrar ils morts lur morts, mo ti va ed annunzia il reginavel da Diu.
61Aunc in auter ha detg ad el: Jeu suondel tei, Segner, mo lubescha a mi igl emprem da prender cumiau dils da casa. 62Mo Jesus ha rispundiu ad el: Quel che metta il maun vid il criec e mira anavos ei buc adattaus per il reginavel da Diu.
