da sur Martin Bearth
Tgei rispundessen nus, ti ed jeu, sch’enzatgi dumandass nus: «Tgi ei in cristifideivel?» Cardinal John Henry Newman (†️1890), in pionier arisguard il patertgar teologic da nies temps sur da pievel da Diu, laics e.a., el ha rispundiu alla sura damonda: «Cristifideivel ei in che spetga sin Cristus, buca sin gudogn, renum, divertiment e beinesser, mobein in che mira sil Salvader, il Segner Jesus Cristus.»
En quest evangeli di Jesus, tgei ch’el spetga da ses adherents. El di dad esser veglionts, semtgai per sia vegnida, haver portas aviartas, cu el vegn e splunta. El di era, tgei ch’el manegia cul plaid «veglionts». Mintgin duei far «siu duer». Tgei ei nies duer? Era quei di Jesus: «Carezar Diu da tut cor ed il proxim sco sesez.» Buca mo bials plaids e teorias decidan, mobein oravontut ovras.
Lc 12,32–48
32Seigies senza tema, ti pintga muntanera, pertgei ei ha plaschiu a vies Bab da dar il reginavel a vus.
33Vendei vies possess e dei ei per almosna. Procurei per buorsas che vegnan buca isadas, per in scazi che vegn buca dil meins, in scazi en tschiel, nua che laders pon buca vitier e mulauns san buca disfar. 34Pertgei nua che vies scazi ei, leu ei era vies cor.
35Veies la tschenta entuorn veta e las glischs envidadas. 36Seigies sco carstgauns che spetgan lur patrun, cura ch’el tuorna dallas nozzas, per ch’ei sappien arver ad el, aschiprest ch’el vegn e splunta. 37Beai quels fumegls ch’il patrun anfla veglionts, cura ch’el vegn! En verdad, jeu ditgel a vus: El vegn a metter si scussal, far semetter els a meisa, ir dad in tier l’auter e survir els. 38Era sch’el vegn pér la secunda ni tiarza ura da guardia ed anfla els aschia, beai ein els!
39Ton saveies: Sch’il patrun-casa savess da tgei uras ch’il lader vegn, schass el buca rumper en el. 40Seigies era vus preparai, pertgei il Fegl dil carstgaun vegn d’ina ura che vus maina smineis.
41Cheu ha Pieder detg: Segner, dias ti quella semeglia mo per nus ni per tuts? 42Il Segner ha rispundiu: Tgi ei bein il fideivel e prudent fumegl ch’il patrun vegn a tschentar sur sia entira casada, per ch’el detti vivonda ad els a dretg temps? 43Beaus il fumegl ch’il patrun anfla fagend siu duer, cura ch’el tuorna! 44En verdad, jeu ditgel a vus: El vegn a tschentar el sur tut ses beins. 45Mo sch’il fumegl di en siu cor: Miu patrun s’entarda, ed el entscheiva a dar fridas a fumegls e fumitgasas, a magliar e beiber e buedrar, 46lu vegn il patrun da quei fumegl in di ed in’ura ch’el ni spetga ni smina. El vegn a tagliar el en tocs e fierer el leu, nua ch’in malfideivel s’auda.
47Quei fumegl ch’enconuscha la voluntad da siu patrun, mo prepara nuot e fa buca tenor sia voluntad, survegn bia fridas. 48Quel denton ch’enconuscha buc ella e fa da quei che mereta fridas, survegn mo paucas. A tgi ch’ins ha dau bia, da quel vegn ei era pretendiu bia; a tgi ch’ins ha confidau bia, da quel vegn ei pretendiu aunc dapli.
