da sora Maria Vincenz
Ils leprus dil temps da Jesus stuevan viver ordvart, dapersei da lur famiglias, dalla societad, sco en in «ghetto». Quei vegn gia scret el cudisch Leviticus dil Veder Testament (Lev 13,45s). Aunc pli gronds e profunds fuva il sentiment d’esser emblidai da Diu. Ils leprus han dau si la speronza da survegnir in di agid e vegnir medegai. – Gedius e samaritans, schiglioc inimitgs, partan la medema situaziun, miseria e malsogna en lur camp. In sulet giavisch unescha els: «vegnir sauns».
Jesus, sin via viers Jerusalem, vesa quels 10 leprus – va encunter ad els – auda lur clom: «Jesus, mussader, hagies cumpassiun da nus!» (17,13). Jesus sveglia speronza en els! El medeghescha tuts 10 e tarmetta tuts, sco la lescha pretenda, tier ils sacerdots. Sin via vegnan tuts medegai, purificai. Mo in dils diesch medegai tuorna anavos tier Jesus ed engrazia ad el ed a Diu! … La sentupada cun Jesus medeghescha! – Jesus offerescha salit al carstgaun che sevolva cartend tier el. Nua ein ils auters nov? Emblida il carstgaun aschi dabot d’engraziar!
Lc 17,11–19
11Sin viadi viers Jerusalem ei Jesus ius permiez atras la Samaria e la Galilea. 12Vegnend el en in vitg, ein diesch leprus vegni encunter ad el. Els ein stai dalunsch, 13han alzau lur vusch e clamau: Jesus, mussader, hagies cumpassiun da nus! 14Vesend els, ha el detg ad els: Mei e sepresentei als sacerdots! E duront ch’els eran aunc sin via, ein els vegni purificai. 15In dad els, vesend ch’el era sauns, ei turnaus anavos ed ha ludau Diu cun aulta vusch. 16El ei sefretgs per tiara avon ils peis da Jesus ed ha engraziau ad el. E quei fuva in Samaritan. 17Jesus ha priu il plaid e detg: Ein buca diesch vegni purificai? Nua ein tschels nov? 18Ha mo quei jester anflau per bien da turnar e dar gloria a Diu? 19Ed el ha detg al Samaritan: Stai si e va! Tia cardientscha ha salvau tei.
