dad Andri Casanova-Baumgartner
La semeglia da quest evangeli tschontscha da duas persunas ch’ein idas si el tempel per far oraziun. Dad ina vart ei il farisè, ina vera caricatura da quel che crei dad esser gests; e da l’autra vart il publican sco tipic exempel per il puccont.
La semeglia ei in tec maligna, pertgei ch’ella ha per consequenza che nus semettein immediat encunter il farisè e scurlein il tgau pervia da quel. Forsa havein nus schizun avon egl persunas da nies temps ch’ein sco quei farisè. En quei mument essan nus ir directamein ella trapla. Nus sbittein enzatgi, sco quei ch’il farisè fa.
La devisa ei pia da mirar sin l’atgna veta a moda sincera e senza grond tamtam. In Rabbi ha giu getg inaga: «Buca sentenziescha enzatgi, tochen il gi che ti eis sezs ella medema situaziun» (Rabbi Hillel).
Lc 18,9–14
9A zacons che sequintavan dad esser gests e sbittavan ils auters ha el raquintau sequenta semeglia: 10Dus umens ein i si el tempel per far oraziun; in era in farisè e l’auter in publican. 11Il farisè steva cheu ed urava siper sesez: Miu Diu, jeu engraziel a ti che jeu sun buca sco ils auters carstgauns: Laders, cugliuns, rumpalètgs, ni era sco quei publican cheu. 12Jeu giginel duas ga ad jamna e dun la dieschma da tut miu gudogn. 13Il publican denton steva dalunsch ed ughegiava gnanc d’alzar ils egls encunter tschiel, mobein pitgava sin siu pèz e scheva: Miu Diu, seigies grazius cun mei puccont!
14Jeu ditgel a vus: Quel ei turnaus a casa giustificaus, l’auter buc. Pertgei scadin che sesaulza vegn sbassaus, e quel che sesbassa vegn alzaus.
