da sur Marcus Flury
Per ils Israelits dil temps da Jesus era il tempel il pli impurtont baghetg. El era il segn dalla vischinonza da Diu, gie l’avdonza da Diu. Aschia era segn dalla fermezia dil pievel e la speronza per il futur. Negin saveva s’imaginar che quei edifeci cul Sontgissim savessi in di vegnir destruius. Jesus ughegia da dir quei.
«Cu vegn quei sgarscheivel a daventar?» Nus savein capir quella damonda. Tgi che ha tema, enquera in tegn. En situaziuns da crisa e tema dat ei adina profets, fauls profets che pretendan da saver exactamein tgei che seigi da far e tgei da tralaschar. Mo Jesus fa attents da dar adatg. Ei dat adina puspei carstgauns ch’interpreteschan tut quei sgarscheivel che schabegia sco smanatscha e castitg da Diu. Jesus sez avertescha da buca seschar surmenar da tals. El di: «Biars vegnan a vegnir en miu num e dir: Jeu sun! ed era: Il mument ei ussa cheu! Buca curri suenter els!» Enstagl da setener vida fauls profets cun lur recepts, astgein nus setener vid El e sia empermischun, numnadamein che tut quei che vegni – era la mort – seigi buca la fin. Dieus vegli la veta.
Lc 21,5–9
5Ad enzacons che schevan ch’il tempel seigi ornaus cun biala crappa e regals votivs ha el detg: 6Ei vegn a dar dis che buc in crap da tut quei che vus veseis cheu vegn a restar in sin l’auter; tut vegn destruiu. 7Cheu han ei dumandau el: Mussader, cu vegn quei pomai a daventar, e tgeinina vegn ad esser l’enzenna che quei vegin a succeder?
8Ed el ha rispundiu: Dei adatg che vus vegnîes buca surmenai! Pertgei biars vegnan a vegnir en miu num e dir: Jeu sun (il Cristus)! ed era: Il mument ei ussa cheu! Buca curri suenter els! 9E sche vus udis d’uiaras e rebelliuns, buca seschei stermentar; pertgei quei sto daventar igl emprem, mo la fin vegn buc immediat.
