da sur Marcus Flury
L’enzenna ch’ei vegnida indicada als pasturs tras ils aunghels han els anflau, numnadamein in affon en in pursepen. Expressivamein vegnan Maria e Giusep numnai. Els retscheivan il messadi tras ils pasturs ed encorschan aschia la muntada da quei affon. Ils pasturs che han retschiert il messadi tras ils aunghels ein daventai annunziaders. Quei ch’ei vegniu detg sur digl affon tegn Maria endamen e meditescha ei en siu cor. En quella tenuta vegn ella a capir adina meglier siu fegl ed accumpignar el tochen sut la crusch.
Il cuort raquent dalla surtagliada muossa ch’igl affon Jesus ei naschius viaden en in ambient giudaic. Entras la surtagliada fa el part dalla ligia che Dieus ha fatg cun siu pievel ed el s’auda tiel pievel da Diu. Siu num Jesus (Jeschua, Josua: Jhwh spendra) indichescha tgei ch’el vegn ad esser: Spindrader dil mund.
Lc 2,16–21
16Ed els ein i cun prescha ed han anflau Maria e Giusep ed igl affon tschentaus el pursepen. 17Havend viu el, han els raquintau dil plaid ch’era vegnius annunziaus ad els sur da quei affon. 18E tut tgi che udeva els fuva plein smarvegl da quei ch’ils pasturs raquintavan. 19Maria denton teneva endamen tut quels plaids e meditava els en siu cor. 20Ils pasturs ein lu returnai glorificond e ludond Diu per tut quei ch’els vevan viu ed udiu, gest sco ei era vegniu detg ad els.
21Suenter ch’ils otg dis ein stai vargai ed igl affon dueva vegnir surtagliaus, han ei mess num Jesus ad el, sco quei ch’igl aunghel veva giu detg, avon ch’el vegni concepius el best dalla mumma.
