da Marcel Köhle
«Encurir il contact» – quei ei in cavazzin ch’ei vegnius endamen a mi duront la lectura da quei (liung) evangeli dalla 5. dumengia da cureisma.
Sco emprem enqueran las soras da Lazarus contact cun Jesus. Ellas speran d’anflar agid tier el. Suenter dus dis semetta Jesus sin via per esser damaneivel ad els.
El raquent da quella sentupada sent’ins ch’ei fa bein allas duas soras che Jesus ei tier ellas. Quei ch’el ha da dir, va a cor ed ellas anflan consolaziun en sia preschientscha e ses plaids. – Mo Jesus enquera era il contact cun il miert Lazarus. El «contactescha» el culs plaids: «Lazarus, neu ora!» – Plaids che dattan veta!
«Encurir il contact» – Forsa era in motto per il temps da coronavirus e curontina: encurir Dieus en siu plaid. In contact che resta pusseivels era en temps d’isolaziun ed in contact che dat agid, consolaziun ed impuls per nossa veta.
Gn 11,1–45
1Lazarus da Betania fuva malsauns; Betania fuva il vitg, nua che Maria e sia sora Marta stevan. 2Quella fuva ei che veva unschiu il Segner cun ieli e schigentau ils peis ad el cun ses cavels; siu frar Lazarus fuva malsauns. 3Perquei han las soras fatg drizzar ora a Jesus: Segner, tiu amitg ei malsauns. 4Cura che Jesus ha udiu quei, ha el detg: Quella malsogna meina buc alla mort, mobein duei promover la gloria da Diu: Il Fegl da Diu duei vegnir glorificaus entras ella. 5Pertgei Jesus carezava Marta, sia sora e Lazarus. 6Havend udiu che Lazarus seigi malsauns, eis el aunc restaus dus dis en quei liug, nua ch’el fuva.
7Lu pér ha el detg als giuvnals: Lein puspei turnar en Giudea. 8Ils giuvnals han rispundiu ad el: Rabbi, pér da cuort levan ils Gedius encarpar tei, e ti tuornas puspei leu! 9Jesus ha dau per risposta: Ha il di buca dudisch uras? Sch’ins viandescha il di, scarpetsch’ins buc, perquei ch’ins vesa la glisch da quest mund. 10Mo sch’ins viandescha la notg, scarpetsch’ins, perquei ch’ins ha buca la glisch. 11Suenter quels plaids ha el cuntinuau: Lazarus, nies amitg, dorma; mo jeu vi ir a destadar el. 12Cheu han ils giuvnals detg ad el: Segner, sch’el dorma, vegn el sauns. 13Jesus denton veva plidau da sia mort, ferton ch’els manegiavan, ch’el plaidi dil ruaus dalla sien. 14Ussa ha Jesus detg aviartamein ad els: Lazarus ei morts. 15Mo pervia da vus sun jeu leds da buc esser staus leu, per che vus carteies. Lein uss ir tier el! 16Tumasch, numnaus il schumellin, ha detg als giuvnals: Lein era nus ir cun el, per murir cun el!
17Cu Jesus ei arrivaus leu, ha el constatau che Lazarus schischeva gia quater dis en fossa. 18Betania fuva damaneivel da Jerusalem, entuorn quendisch stadis. 19Bia Gedius fuvan vegni tier Marta e Maria per cunfortar ellas pervia da lur frar. 20Udend che Jesus vegni, ei Marta ida encunter ad el; Maria denton ei stada en casa. 21Marta ha detg a Jesus: Segner, sche ti fusses staus cheu, fuss miu frar buca morts. 22Mo era ussa sai jeu: Tut quei che ti damondas da Diu, vegn Dieus a dar a ti. 23Jesus ha detg ad ella: Tiu frar vegn a levar da mort en veta. 24Marta ha rispundiu: Jeu sai ch’el vegn a levar da mort en veta tier la levada dil giuvenessendi. 25Jesus ha detg: Jeu sun la levada e la veta; tgi che crei en mei, vegn a viver, era sch’el miera, 26e scadin che viva e crei en mei, vegn en perpeten mai a murir. Creias ti quei? 27Marta ha dau per risposta: Gie, Segner, jeu creiel che ti eis il Messias, il Fegl da Diu, che duei vegnir sil mund.
28Suenter quels plaids eis ella ida naven, ha clamau sia sora Maria e detg ad ella sut vusch: Il Mussader ei cheu e cloma tei. 29Udend quei, eis ella spert levada en pei ed ida tier el. 30Jesus fuva numnadamein aunc buca vegnius el vitg; el fuva aunc leu, nua che Marta veva entupau el. 31Ils Gedius ch’eran en casa cun Maria e consolavan ella, han viu ch’ella ei spert levada en pei ed ida giuado; cheu ein els suandai ella, secartend ch’ella mondi alla fossa per bargir. 32Cu Maria ei vegnida leu, nua che Jesus fuva, ed ha viu el, eis ella sefiersa giun plaun avon el ed ha detg ad el: Segner, sche ti fusses staus cheu, fuss miu frar buca morts. 33Cu Jesus ha viu ch’ella bargeva e ch’era ils Gedius che fuvan vegni cun ella bargevan, eis el s’indignaus e sevilentaus. 34El ha detg: Nua veis satrau el? Ei han rispundiu ad el: Segner, neu e mira! 35Cheu ha Jesus bargiu. 36Ils Gedius han detg: Mirei, con bugen ch’el ha giu el! 37Mo zacons schevan: Vess el, che ha aviert ils egls al tschiec, buc era saviu impedir che quel cheu stoppi murir? 38Cheu ei Jesus puspei s’indignaus ed ei ius tier la fossa. Ei fuva in cuvel cun in crap davonsi.
39Jesus ha detg: Dustei il crap! Marta, la sora dil defunct, ha rispundiu: Segner, el freda gia; igl ei gia quater dis ch’el ei morts. 40Jesus ha dau per risposta: Hai jeu buca detg a ti: Sche ti creias, vegns ti a veser la gloria da Diu? 41Cheu han ei dustau il crap. Jesus denton ha alzau ses egls e detg: Bab, jeu engraziel a ti, che ti has exaudiu mei. 42Jeu hai saviu che ti exaudies adina mei; mo pervia dil pievel che stat cheu dentuorn hai jeu detg quei, per ch’els creigien che ti has tarmess mei. 43Suenter quels plaids ha el clamau cun aulta vusch: Lazarus, neu ora! 44Cheu ei il miert vegnius neuado; ses peis e mauns eran ligiai cun faschas, e la fatscha fuva cuvretga cun in sudari. Jesus ha detg ad els: Sligei las faschas e schei ir el!
45Biars dils Gedius che fuvan vegni tier Maria ed han viu, tgei che Jesus veva fatg, han cartiu en el.
